“En ‘Prefiero ver llover’ hai un cambiu estilísticu bastante importante”, asegura Silvia Quesada

El segundu trabayu de Silvia Quesada yá ye una realidá. Llámase ‘Prefiero ver llover’ y nél la cantante de Brañameana, que va presentalu’l vienres en direuto en La Felguera, exhibe “un cambiu estilísticu bastante importante” con respeuto a ‘La pena abierta’.

Compuestu por 10 cantares grabaos en Lleón baxo la producción del cantante Fabián –que collabora nel corte ‘Podía ser peor’–, Juan Marigorta y Pepe López, ‘Prefiero ver llover’ ye’l discu nuevu de la vocalista procedente del folk nel so estilu más averáu al pop al que pasó de la mano d’Alfredo González animada pol propiu cantautor y por Pablo A. Quiroga. ‘La mesma revolución’, tema d’adelantu del álbum qu’edita A Mansalva, yá dexó ver delles pincelaes de la evolución de Quesada, que se confirma nel resultáu final d’esti trabayu.

“‘La pena abierta’ ye un discu más desnudu, con poca instrumentación. Eso cambia en ‘Prefiero ver llover', onde la mio voz acompáñase de batería, baxu, guitarra llétrica y percusión llatina”, esplica la cantante, qu’asegura sentise más cómoda nesti segundu trabayu “con temes d’otra tesitura, más ‘poperos’”. Un boleru, una ranchera “deconstruyida” o un tema discu son dalgunes de les sorpreses que los siguidores de Quesada van atopar nesti álbum nel qu’Alfredo González torna tener “un papel fundamental tanto na composición, al componer cuasi’l cien por cien de los cantares, como no personal pol so apoyu”, confirma.

‘Prefiero ver llover’ yá lleva unos díes a la venta tanto físicamente como en plataformes dixitales, con un bon recibimentu del públicu, que va poder disfrutar de los cantares en direuto, xunto con otros de ‘La pena abierta’, nel conciertu de presentación d’esti vienres nel Teatru Nuevu de La Felguera. Nél ta confirmada la presencia de Fabián pa cantar ‘Podía ser peor’ y de Javier Tejedor, compañeru de Quesada nel yá desapaecíu grupu Tejedor que compunxo una melodía pal discu.

El preciu de la entrada ye de 6 euros anticipada al traviés de la web oficial de la cantante y de 10 na puerta’l mesmu día de l’actuación, prevista pa les 20 hores. Va ser la primera d’otres munches que van llevar a Quesada a actuar per toda Asturies y inclusive fuera de les nueses llendes.

Asina, la segunda fecha de la xira va ser el día 25 en Santander, nel espaciu Eureka, y tamién ta confirmáu un conciertu en Madrid, en Libertad 8, el 6 de marzu dientro d’una programación especial protagonizada por muyeres. “Igual qu’hai munchos cantantes que trunfen cantando namái en catalán o gallegu, tamién creo que se puede llegar a la xente n’asturianu”, apunta la de Brañameana, ilusionada con llevar la so música fuera del país.

Semeya obra de Glendor Díaz.