Huergo: “La llista de Ganar Xixón ta apegada a la realidá non sólo de la ciudá, sinón del conceyu nel so conxuntu”

Les primaries de Podemos Xixón comenzaron güei y van allargase hasta les 18 hores del miércoles. L’asturianista Yolanda González Huergo (Xixón, 1971) encabeza la llista Ganar Xixón 2019, formada por persones venceyaes al deporte, el feminismu, el sindicalismu o la cultura asturiana, que s'enfrenta a Piensa Xixón de Rosa Espiño. 

¿Cuáles son los aspeutos fundamentales de la so candidatura?

Ún de los aspeutos que más me presta de la llista que llidero ye que tamos apegaos a la realidá de Xixón y non sólo de la ciudá, y esto prestáme remarcalo, sinón del conceyu nel so conxuntu. Somos un grupu de persones con formaciones y sensibilidaes dintintes que fuimos quien a formar un equipu. Esto, que paez fácil o evidente, nun ye tan habitual, poro, toi mui arguyosa de Ganar Xixón 2019 y lo que representa. Agradezco-yos la so confianza y la so responsabilidá.

¿Quiénes son los sos compañeros de viaxe?

Acompáñenme  Juan Chaves, Laura Tuero, Carlos Rodríguez, Inés Mallada, Jose Manuel Lago, Eve Blanco, Llorián García, Lorena Montes, Ana María García y Marián Alonso. Persones mui vinculaes al mundu del deporte, al feminismu, al sindicalismu, el mediu ambiente, l’urbanismu, la movilidá y la cultura asturiana.

Mario Suárez del Fueyo, voceru de Xixón Sí Puede, impulsó la llista xunto con vusté pero finalmente decidió apartase de la primer llinia y nun apaez nella. ¿Entiende la so decisión?

Desplicar de manera fondera la so decisión correspuende-y a Mario, pero sí me gusta sorrayar que, como él mesmu dixo, ye un pasu normal de relevu, lo que pasa que la xente nun ta avezada a ver eso n’otros partíos, por esa razón dalgo que pa nosotros ye normal, xenera tantes entrugues. En política tase de munches maneres.

Tres la salida de EQUO de Xixón Sí Puede, ¿va presentase Podemos en solitario o la intención ye la de confluyir con otres fuercies y siguir apostando por una candidatura de xunidá popular?

Va unos meses punximos enriba la mesa la intención de construyir una confluencia lo más amplia posible de cara a estes eleiciones municipales sobre la base d’idegues y oxetivos comunes, tanto con otres fuercies como con coleutivos vecinales, culturales y sociales. Y nesti sen vamos seguir trabayando.

¿Ye necesariu un cambiu nel Conceyu depués de dos llexislatures de la derecha en Xixón?

Si tien un valor la presencia de Podemos na política xixonesa ye que-y dio un aire frescu a un panorama municipal bastante desolador. Un Foro ensin saber qué facer con una ciudá a la que nun ye quien nin a da-y capacidá de xestión, xunta un PSOE incapaz de reflexionar sobre’l so conformismu con una situación desastrosa y allancáu nes dinámiques del pasáu, espeyen a les clares la necesidá de cambiu de gobiernu y polítiques.

Convertise nuna de les llamaes ciudaes del cambiu tien que sirvir pa que la sociedá xixonesa vea que se pueden cuestionar inercies y redirixir esfuercios. Un datu revelador: cómo puede ser qu’esti conceyu perdiera hasta 4.034 habitantes nuna década; cómo podemos soportar esti datu y nun facer nada.

¿Habrá entendimientu ente la izquierda depués del 26 de mayu?

Pola nuestra parte habrá tola voluntá del mundu de sentase a falar y contruyir. Pero tien que ser pa facer otra cosa diferente a lo que llevamos viendo dende va munchos años. Esto va depender abondo de la rellación de fuercies que salga de les próximes eleiciones, y ehí tenemos claro que nós tenemos que ser la garantía d’esi procesu. Poro, hai qu’aspirar a sacar el meyor resultau si queremos incidir de verdá nes decisiones.

Vusté vien del asturianismu, con munchos años de militancia. ¿Esiste en Podemos una visión de país?

Nun taría si nun la viera. La presencia de Podemos Asturies ximielgó la política asturiana, poniendo enriba la mesa esos temes de los que munches vegaes se fala nel asturianismu: la defensa de los nuestros intereses dende la solidaridá de los pueblos, la denuncia del rexime qu’estró Asturies de casos vergoñantes de corrupción o la inaplazable oficialidá de la llingua asturiana. Ye un espaciu pal cambiu dende la perspeutiva asturiana que necesitamos nes instituciones y nes cais.

Vengo d’esi asturianismu progresista que cuando naz Podemos decide aportar a un proyeutu que suma pa crear una mayoría na que nun se-y pregunta a la xente d’onde vien, sinón a ónde va. Esa sensibilidá, xunto a  munches otres, ye la que conforma Podemos y la que lu convierte nuna ferramienta que suma.