La situación de la lliteratura infantil y xuvenil n’Asturies protagoniza una mesa redonda n’Avilés

Palaciu de Valdecarzana

María Esther García López y Iris Díaz Trancho son dalgunes de les espertes convidaes al alderique ‘La lliteratura infantil y xuvenil n’Asturies güei’. Celébrase nel marcu de la esposición ‘Que nos quiten lo lleío. 30 años de lliteratura xuvenil n’Asturies’ que se pue visitar hasta'l vienres nel avilesín Palaciu de Valdecarzana.

La mesa redonda va afondar na “realidá actual de la lliteratura infantil y xuvenil n’Asturies nes trés décades últimes d’evolución teunolóxica, lliteraria y social vertixinosa, dende les perspeutives qu’aporten los diferentes estamentos implicaos na espublización y distribución de les obres, asina como’l so impautu na sociedá, non sólo ente los sos destinatarios finales”, espliquen dende la conceyalía de Cultura. Ente otres cuestiones, va falase “de la lliteratura pa la mocedá en castellanu y asturianu, de cuáles son les necesidaes y faltes qu’han d’afrontar los profesionales del ramu, la incidencia del llibru dixital y les perspeutives de futuru del xéneru”.

Va ser la propia conceyala Yolanda Alonso la que, a les 19 hores d’esta tarde, va presentar esti alderique nel que van participar el coordinador de l’amuesa Paco Abril, la poeta Esperanza Medina, l’ilustrador Goyo Rodríguez, la fundadora de la editorial Pintar-Pintar Ester Sánchez, la bibliotecaria Teresa Pasarín, l’espertu Severino Antuña y les llectores Inés Avello y Eva Rodríguez, amás de Esther García y Iris Díaz Trancho, autores en llingua asturiana. Los asistentes tamién van poder disfrutar de la esposición instalada nel llugar, una retrospeutiva sobre los autores, los profesionales de la ilustración y les editoriales que punxeron la so firma al cuento y el cómic asturianu destináu a los más mozos nes trés décades últimes que se clausura mañana.