Los cantares de 'Bestiariu' abren el primer semestre del ciclu avilesín La Reciella de la Factoría
Alicia Álvarez y David Varela van poner un conciertu n’acústicu con una esbilla de los cantares de ‘Bestiariu’, proyeutu qu’axunta a decenes de grupos asturianos con cantares con animales como filu conductor. Esta actividá va abir el primer semestre del ciclu La Reciella de La Factoría qu’aporta a Avilés teatru, música y cuentos.
La impulsora del proyeutu xunto a David Guardado compuestu por 3 discos, entamaos por La Fabriquina cola edición d’Araz –empresa editoria tamién d’A la Gueta los Suaños–, faise acompañar del músicu pa interpretar dalgunos de los cantares favoritos de les neñes y neños sobre la sacavera, el ratu, l’oriciu, la raposa o l’hipopótamu. La cita ye a les 19 hores d’esta tarde na Factoría Cultural y la entrada ye llibre hasta’l comienzu del espectáculu.
El restu d’actividaes que componen el primer semetre de La Reciella de La Factoría son ‘Nun quiero ser princesa’, d’Ana Morán (15 de marzu); ‘El viaxe d’Irina de Dominique Vernay’, d’Olga Cuervo y David Varela (5 d’abril); y ‘Hansel y Gretel’, d’Higiénico Papel, obra ganadora del I Premiu y Festival de Teatru Profesional en Llingua Asturiana y Gallego-asturiano. Esta iniciativa naz de la collaboración de ‘Reciella. Families pol Asturianu’ cola Estaya de la Llingua d’Avilés.