El 12 de xunu del 1987 Corsino Suárez Miranda finaba nun accidente d’helicópteru nos Llagos xunto a otres seis persones y perros de rastréu na busca d’un neñu perdíu. 31 años más tarde la Conseyería d’Educación y Cultura y el SEPA recuérdenlu con un certame artísticu y lliterariu pa escolinos d’Infantil y Primaria.

‘Traktorn som så gärna ville somna’, la última obra del ésitosu autor de lliteratura infantil Carl-Johan Forssén, pue disfrutase n’asturianu gracies a la torna de Xesús González Rato. La versión en llingua asturiana lleva’l nome de ‘El tractorín que quier dormir’.

El taller ‘Rimando n’asturianu’ estrenóse con ésitu’l mes pasáu en La Xungarosa, completando toles places y con tolos participantes con ganes de repetir. El segundu va celebrase'l vienres na biblioteca de La Carriona y ta destináu tamién a neñes y neños de 6 a 10 años.

L’espectáculu de marionetes ‘La neña de les trences al revés’, d’El Callejón del Gato, es la primer de les cuatro actividaes nesti semestre de La Reciella de la Factoría. Esta iniciativa entámala la Estaya de la Llingua d’Avilés con ‘Reciella. Families pol Asturianu’.