L'Arena yá ta preparada pa recibir a L'Anguleru

L'Anguleru

La llegada a la desaguada del Nalón na so embarcación ta prevista pa les 18.30 hores.

Yá aportó. Güei ye'l día esperáu por miles de neñes y neños asturianos: L'Anguleru yá ta equí.

En realidá yá lleva n'Asturies unos díes, con presencia esta mañana en Xixón, pero nun va faltar cola so cita añal en L'Arena, per onde entra al ríu Nalón pa comenzar cola pesca de l'angula que vende pa poder llevar regalos a les cases asturianes. Asina, les que foron bones y bonos mientres tol añu, han de dexar un gorru de llana baxo l’árbol de Navidá con dalgo de comer y beber pa que L'Anguleru pueda reponer fuercies y pela mañana atoparán dalguna sorpresa.

La hora prevista de llegada de L'Anguleru ye les 18.30 hores, pa depués participar nuna cabalgata entamada pola Asociación Cultural Garabuxada per L'Arena, que llama a toles neñes y neños del pueblu y a visitantes a llevar llinternes o farolinos como'l qu'usa L'Anguleru pa guialu hasta'l cai.

Pa saber más sobre esti personaxe navidiegu y otros aspeutos de la Navidás asturiana, pues consultar el nuesu reportaxe 'Navidá 2018'.