Huergo gana les primaries de Podemos y optará a l’alcaldía de Xixón

|
Yolanda Huergo Ganar Xixón 2019

Nuna votación axustada, como s’esperaba, Yolanda González Huergo proclamóse vencedora de les primaries de Podemos Xixón y será la cabeza de llista de la formación nes municipales del 26 de mayu. Superó a Rosa María Espiño por un total de 33 votos.

Nes votaciones telemátiques pa escoyer a la candidata a l’alcaldía y el cuerpu de llista, que comenzaron el vienres pasáu y finaron a les 18 hores del miércoles, participaron 1.005 persones, de les que 509 optaron por González Huergo (51,68 por cientu) y 476 por Espiño (48,32 por cientu), con 20 votos en blancu (1,99 por cientu). La ganadora lideraba la candidatura Ganar Xixón 2019, mientres que la diputada facía lo propio con Piensa Xixón.

D’esta forma, la veterana militante asturianista liderará la llista de Podemos Xixón a l’alcaldía. Tres la salida d’EQUO, que provoca’l final de la candidatura de xunidá popular Xixón Sí Puede, falta por conocer si la formación morada va dir en solitariu a les eleiciones o en confluencia con otres organizaciones, como deseó González Huergo a Asturies.com nuna entrevista previa a les primaries: “Va unos meses punximos enriba la mesa la intención de construyir una confluencia lo más amplia posible de cara a estes eleiciones municipales sobre la base d’idegues y oxetivos comunes, tanto con otres fuercies como con coleutivos vecinales, culturales y sociales. Y nesti sen vamos seguir trabayando”.

Cuerpu de llista

Nestes primaries tamién s’escoyía’l cuerpu de llista, resultando ente los más votaos persones que formaben parte de les dos candidatures. Asina, el meyor resultáu foi pa Laura Tuero, de Ganar Xixón, y el segundu p’Alba González Sanz, de Piensa Xixón.

Los siguientes con más sofitos ente los venti candidatos presentaos foron Juan Miguel Chaves (Ganar Xixón), Alejandro Zapico (Piensa Xixón), Carlos Rodríguez González (Ganar Xixón), David Posada (Piensa Xixón), Inés Mallada (Ganar Xixón), María Alejandra Tejón (Piensa Xixón), Eve Blanco (Ganar Xixón) y Abdellahi Athman (Piensa Xixón).

Contador Estadistiques