Silvia Quesada: "'La pena abierta' yera un discu necesariu na escena asturiana"

|
Silvia Quesada

Silvia Quesada (Brañameana, 1986) despide la xira del so trabayu 'La pena abierta' con un conciertu en Tinéu esti sábadu con entraes a la venta por 6 euros, anticipada, y 8, na puerta, y collaboraciones de primer nivel. Con un discu nuevu nel fornu, la cantante faló con Asturies.com sobre'l que foi'l so esitosu primer proyeutu en solitariu.

Hai cinco años del llanzamientu de ‘La pena abierta’. ¿Qué valoración fai del discu cola perspeutiva que da’l tiempu?

Depués de tantos años nun puedo dexar d’encontrar fallos nos aspeutos más téunicos del discu, pero imaxino qu’eso ye normal, porque vamos evolucionando y les canciones van creciendo en cada conciertu, por eso hai coses qu’agora mesmo cambiaría. Pero en xeneral foi un discu con una impresionante acoyida, fuera de too pronósticu. Yera un discu necesariu na escena asturiana.

¿Recibió bien el públicu’l so cambiu de rexistu, avezáu a vela nel tarrén del folk?

En realidá nunca dexé de llau el folk, saqué’l discu pero seguí cantando con Tejedor. Ye dalgo que nunca voi abandonar, llévolo mui dientro de min. Pero creo que sí foi bien recibíu, nun había nadie n’Asturies faciendo dalgo parecío y n’asturianu.

¿Cuáles son los momentos que recuerda con más ciñu de tantos conciertos interpretando los cantares d’esti discu?

Quedóme grabáu na memoria’l día de la presentación. Foi en Mieres, en xineru del 2014. Yera una prueba de fueu. Nun sabía si diba haber xente o non, nin si diba a gusta-yos a los que diben velu; poques veces tuvi tan nerviosa. Pero salir al escenariu y ver toles butaques ocupaes y a la xente en pie al terminar foi increíble. Y por supuestu guardo con munchu ciñu toles veces que canté en Tinéu. Tengo que dicir que siempre m’apoyaron muncho ellí.

Zarra la xira cerquina del so llugar de nacencia con un conciertu con collaboraciones como les de Nacho Vegas o Marisa Valle Roso. ¿Qué más sorpreses nos esperen?

Nacho y Marisa yá nun van ser sorpresa pal públicu, pero yo nun dexo de tar sorprendía de que vayan a acompañame nuna fecha tan importante pa min. Pueo adelantar que va a haber más coses esi día, pero pa conoceles hai qu’averase a Tinéu.

Depués d’esta cita, ¿qué proyeutos tien en mente Silvia Quesada?

Hai un discu yá en camín del que pronto vais poder escuchar dalgún adelantu. Pero primero quiero zarrar la etapa de 'La pena abierta' como se merez.

¿Pa cuándo podremos disfrutar de los cantares nuevos?

Mui pronto habrá noticies pero, de momento, tengo que guardar el secretu.

¿Sigue teniendo Alfredo González un pesu importante nel so proyeutu?

Silvia Quesada nun esistiría ensin él.

¿Cómo ve anguaño la salú de la música asturiana?

Creo qu’ Asturies gocia de mui bona salú musical en cuanto a calidá de músicos, intérpretes y compositores. Lo que nos falta a n’Asturies ye sofitu promocional, tener más visibilidá nos medios y que sea dalgo equitativo, non que se centre too nun tipu de música nin na mesma xente de siempre. Hai xente tremendamente bona que nun tien un espaciu pa mostrar na tele lo que fai.

¿Ye difícil salir fuera cantando en llingua asturiana?

Ye un tema complicáu. Con 'La pena abierta' descubrí qu’hai muncha xente ensin prexuicios col idioma. La mio música llegó en formatu CD a Valencia, Vitoria, Galicia y Madrid, ente otros llugares, y naide nun punxo problema por tar en llingua asturiana, tolo contrario, la xente valóralo muncho, quiciabes más que dalgunos asturianos… Pero organizar una xira fuera ye un poco suicida. Hai qu’almitir que cantando sólo n’asturianu tamos poniéndonos una barrera pa llegar a más xente, aunque nun debiera ser asina. Quiero creer que, de la mesma forma que la xente escucha música n’inglés, un día nun tengamos problema pa sentir música en galego, en catalán o en eusquera. Yo fáigolo.

Contador Estadistiques