Iniciativa pol Asturianu y Ástura entamaron el vienres un homenaxe a Pachín de Melás, fináu hai agora 75 años. “Tenemos el deber d’esparder y de caltener el significáu de la obra de Pachin de Melás”, afirmó Xuan Pandiella.

Carlos Pulgar, Vítor Suárez, Félix Fernández y Dolfu Camilo Díaz participaron na charra ‘Llingua asturiana güei. Perspectives de presente y futuru’ entamada pol Atenéu N’Alfoz. El papel del idioma nel enseñu y la oficialidá foron temes d'alderique.

L’Anuario de la Música Asturiana (AMAS) anunció la puesta marcha d’un concursu pa grupos asturianos de tolos estilos, de nome FestiAMAS. Ésti va dividise en cuatro semifinales, nes que tamién van actuar Dixebra y Los Berrones.

VAV Compañía de Producciones, empresa asentada en Madrid, va encargase de la ellaboración de los conteníos llocales pa los informativos de la TPA. Andecha considera “inaceptable” esta axudicación y critica'l sucursalismu del Gobiernu.

La infanta Cristina foi citada a declarar pol xuez José Castro’l 27 d’abril a les 10 hores pola so participación supuesta na trama del 'Casu Nóos'. La imputación produzse una selmana depués de que Diego Torres aportara correos nuevos al maxistráu.

Alredor de cien chigres van ufrir una cazuela y una botella de sidra d’escoyeta pol preciu de 3 euros ente’l 15 y el 21 d’esti mes. La primer mesa de preba d’esta sidra fecha con venti variedaes de mazana autóctona celébrase esti miércoles.

En ‘Conceyu Abiertu’ plantegamos a los nuesos usuarios si-yos prestaba que’l Papa Xicu I fora llatinoamericanu. Un 65 por cientu de los nuesos llectores señaló que nun-y interesaba lo que se fixera na Ciudá del Vaticanu.

En castellanu y n’inglés. Éstes son les dos llingües nes que se pue visitar la versión nueva de la web de la Universidá d’Uviéu. Vicente Gotor confirmó al CUPA que l'ausencia del asturianu débese a un retrasu na torna de los conteníos.

Toni Fidalgo, presidente del Uviéu, confirmó que’l 3 de xunetu va tener llugar una xunta xeneral estraordinaria d’accionistes col oxetivu de camudar el conseyu d’alministración. El rexidor de la entidá dixo “tar hasta los güevos”.

Aguachica ye’l primer destín de la novena Delegación Asturiana de Verificación de Derechos Humanos en Colombia, que yá ta trabayando nel terrén. La so presencia foi solicitada por cinco organizaciones sociales colombianes.