La situación del idioma, tema d’alderique del Atenéu N’Alfoz

|

Carlos Pulgar, Vítor Suárez, Félix Fernández y Dolfu Camilo Díaz participaron na charra ‘Llingua asturiana güei. Perspectives de presente y futuru’ entamada pol Atenéu N’Alfoz. El papel del idioma nel enseñu y la oficialidá foron temes d'alderique.

Esti coleutivu formáu por ciudadanos d’Avilés, Castrillón, Corvera y Illas entamó’l xueves nel avilesín El Cafetón la segunda conxusta dende qu’entamó la so actividá, nesti casu sobre la situación actual de la llingua asturiana y el so futuru. Pa ello, convidaron a persones perteneciente a asociaciones que trabayen na defensa del idioma dende dellos ámbitos. Por parte de la Xunta pola Defensa de la Llingua Asturiana acudió’l so voceru, Carlos Pulgar, que faló de la necesidá de dar visibilidá al asturianu y de poner na axenda política la oficialidá, incidiendo na presencia de la llingua nel enseñu, nos medios de comunicación y n’alministración pública.

Pela so parte, Suárez, vicepresidente d’Iniciativa pol Asturianu, faló’l del llabor d’esti coleutivu, que se centra na demanda del plenu desendolcu de la llexislación vixente, ello ye, de la Llei d’Usu y Promoción del Asturianu, y de la normativa toponímica, asina como incentivar el so usu n’entidaes privaes. Fernández, representante de Reciella, destacó lo importante del papel que quieren cumplir, como un llugar d’alcuentru ente families pa que los neños d’ente 3 y 6 años tengan contautu col idioma, y Dolfu Camilo Díaz, como ex-conseyeru de RTPA, esplicó a los asistentes la situación llaceriosa de la llingua asturiana nel ente públicu de comunicación, onde esistía la orde de torgar nueves iniciatives a favor del asturianu.

Tres les intervenciones de les persones convidaes, diose pasu a un alderique interesante colos asistentes, nes que se faló de la presencia necesaria de la llingua nel enseñu, la situación de los maestros y la dificultá d’atopar llugares pal deprendizaxe de los adultos. Amás, afalóse a la collaboración ente les asociaciones.

 

Contador Estadistiques