La versión nueva de la web de la Universidá nun incorpora l’asturianu

|

En castellanu y n’inglés. Éstes son les dos llingües nes que se pue visitar la versión nueva de la web de la Universidá d’Uviéu. Vicente Gotor confirmó al CUPA que l'ausencia del asturianu débese a un retrasu na torna de los conteníos.

El Conceyu Universitariu pol Asturianu (CUPA) denunció esta situación nueva, esperando una solución que, al paecer, pronto llegará. "Aguardamos que se trate d'una situación temporal y que la páxina cunte con versión n'asturianu en pocu tiempu", espliquen dende’l coleutivu, que considera que "lo contrario sedría dar un pasu atrás mui importante y contrariu a los alcuerdos algamaos pol rector nes eleiciones pasaes, onde se comprometió a afondar na normalización y usu del asturianu dientro de la institución". Los responsables del coleutivu yá treslladaron el so esmolecimientu a Vicente Gotor y al vicerrector d’Informática, Víctor Guillermo García, recibiendo la respuesta de que l’ausencia de l’asturianu débese a un retrasu na torna de los conteníos de la web, dalgo que nun ye escusa pal CUPA.

Tamién amosó la so disconformidá pola ausencia del asturianu na web l’Asamblea d’Estudiantes de la Universidá d’Uviéu, que calificó como un “pasu atrás históricu na normalización llingüística de la llingua asturiana na institución” l’escaezu del idioma del país. “La portada de la nueva –y mui ameyorable– páxina web de la Universidá d'Uviéu amuesa les opciones p'acceder a la so versión en castellanu y n'inglés, pero non n'asturianu, magar qu'esta llingua s'usare na versión anterior, que, a diferencia de la inglesa, ta protexida de forma esplícita polos Estatutos de la Universidá y que'l so usu institucional, tamién na páxina web, ye un compromisu esplícitu del rector Vicente Gotor”, señalen los estudiantes, que mañana pensaben presentar una quexa formal al traviés de los sos representantes nel Conseyu de Gobiernu de la institución. Esti coleutivu entiende que “l'usu institucional de la llingua asturiana xunto a la castellana y otres ha ser normal y un deber na universidá pública d'Asturies y, poro, solicitamos públicamente que s'igüe esti grave retrocesu na normalización del idioma”.

Otros compromisos por cumplir

Coincidiendo cola desapaición de l’asturianu na versión nueva de la web universitaria, el CUPA quier recordar a Gotor otros compromisos del Alcuerdu Programáticu de Política Llingüística na Universidá d'Uviéu que tán tovía ensin cumplir. Asina, ente otros asuntos, apunten que la universidá asturiana tovía nun tien un logotipu billingüe nin redactó un reglamentu que disponga la rotulación n'asturianu de toles instalaciones. Na conversación que tuvieron los sos responsable col equipu rectoral, solicitaron un conceyu pa tratar estos asuntos.

 

Contador Estadistiques