El conseyu d’alministración del Uviéu anuncia que va cesar el 3 de xunetu

Toni Fidalgo, presidente del Uviéu, confirmó que’l 3 de xunetu va tener llugar una xunta xeneral estraordinaria d’accionistes col oxetivu de camudar el conseyu d’alministración. El rexidor de la entidá dixo “tar hasta los güevos”.

Les operaciones pela solombra de delles persones que quieren entrar nel conseyu d’alministración del Uviéu y el malestar poles declaraciones feches a un mediu de comunicación estatal por Arturo Elías Ayub, miembru del conseyu d’alministración del Grupo Carso y xenru de Carlos Slim, lleven al equipu de Fidalgo a poner fecha de caducidá a la so xestión. El 3 de xunetu va celebrase una xunta xeneral estraordinaria con dos puntos nel orde del día: el cese del conseyu actual y el nomamientu d’ún nuevu.

La escoyeta d’esta fecha por parte de Fidalgo ye pa nun interferir na marcha deportiva del equipu y, amás, pa que los rexidores nuevos del club tengan tiempu pa preparar la planificación deportiva de la temporada 2013-2014. El presidente tamién confirmó que na entidá nun se va falar nada más que de fútbol d’equí a que fine la temporada.