UNA pide-y a Riopedre que se-y dea un ordenador a cada profesor, s’aseguren les conexones y s’use software libre

El candidatu d’UNA a les europees Daniel Fernández afirma que la propuesta Zapatero de da-y un ordenador al alumnáu pue ser un brindis al sol sinon cuenta cola implicación del profesoráu ya  infraestructures afayadices.Asimesmo pidió-y al Conseyeru d’Educación d’Asturies, José Luis Iglesias Riopedre, qu’esplique “cómo se va a xestionar la midida de Zapatero d’apurri-y un portátil a cada alumno de quintu de primaria n’Asturies” desque la so Conseyería tien competencies na materia.

Pa Unidá Nacionalista Asturiana esisten dellos problemes como “la necesidá d’un programa de formación pal profesoráu y qu'esti cunte tamién con medios afayadizos pa utilizar na docencia les tecnoloxíes de la información de forma afechisca”.

Fernández afirmó que “los ordenadores nun son una fin en sí mesmos sinon una ferramienta que pa vali-yos a los escolinos y escolines ha integrase nel sistema educativu y eso ye imposible ensin la corercta formación y medios de los profesionales del sector”. Lo que sedría irónico ye que los escolinos y escolines "tuvieren un ordenador y nun lu tuvieren los profesores que son los que-yos tienen qu'esplicar cómo s'emplega". Poro, la midida de Zapatero tien que garantizar que'l profesoráu va tener tamién ordenadores a la so disposición".

Daniel Fernández tamién rescampló “qu'existen abondes zones d'Asturies con problemes respecto a la cobertoria de banda ancho lo qu'afecta a les escueles d'eses zones. Poro "si nun se diseñen midíes pa torgar esti problema, esta propuesta pue tresformase nuna actuación que discrimine a los escolinos y esciolines d'estes zones, especialmente les rurales".

La organización nacionalista pide tamién que “nun se renuncie al software lilbre apostando polsoftware propietario nel sistema educativu asturianu” porque pondría na educación “en manes de les empreses de software abondes ferramientes educatives que cada día van a ser más necesaies nes aules”.

Nesti sen, Daniel Fernández apuntó que’l sistema operativu Ubuntu, que se pue instalar tanto en castellanu como n’asturianu, sedría una bona opción pa integrar de forma cenciella y barata la nuestra llingua nel entornu educativu.