UNA quier "da-y voz a Asturies" nes elecciones europees

El candidatu d'Unidá Nacionalista Asturiana a les elecciones europees Daniel Fernández, presentó n'Uviéu los oxetivos principales d'UNA nestos comicios así como'l lema col que va concurrir: "Da-y voz a Asturies". Según Fernández el primer oxetivu ye “ufrir a tolos asturianos la posibilidá de votar a una fuerza que dea voz a les reivindicaciones d'Asturies".

Daniel Fernández afitó que “votar a UNA puede garantizar a mediu plazu la consolidación d'una organización que defenda los intereses asturianos n'Europa, que ponga a Asturies nel mapa y que vele polos intereses asturianos, sacando al nuesu país d'una situación nel que so pesu políticu ye nulu precisamente pola inexistencia d'una fuerza asturiana con pesu”. Fernández aseguró qu'ensin “una voz propia, los ataques al nuesu sistema productivu tradicional y al nuesu mediu ambiente continuarán n'aumentu, ensin proporcionar alternatives viables, pa que nun futuru mui próximu nos convirtamos en meros productores d'enerxía pa otres zones del estáu”, añadiendo que "la U.E. ye un marcu institucional afayadizu p'aparar estes polítiques, por mor qu'incumplen la mayoría de directives sobre mediuambiente y producción enerxética”.

Defensa de la llingua y apueste "pola llibertá y la democracia"
 
Unidá Nacionalista Asturiana tamién se presenta a estes elecciones pa “dar voz a la defensa de la llingua y cultura asturianes" yá que “les propies instituciones europees reclamen insistentemente información sobre la llingua asturiana y dende los gobiernos español y asturianu nieguen-yla pa a la vez negar la realidá cultural d'Asturies asina como'l so patrimoniu históricu y etnográficu, que'l PSOE cola complicidá d'IU, tan atacando con más virulencia que nunca”.

Finalmente'l candidatu a les europees quixo conseñar que “apostar pol nacionalismu asturianu anguaño ye tamién apostar pola llibertá y la democracia, frente a los que consideren que se pueden saltar los procedimientos democráticos y utilizar les instituciones públiques pa criminalizar al oponente políticu”. Fernández afitó nesti sentíu qu'UNA recibió nos últimos díes una corriente de simpatía ente los asturianos y asturianes "que ye lo que realmente nos importa” y non “lo qu'opinen de nós xente que nin sabría asitiar a Asturies nel mapa”.