El Conceyu de Xixón ta acabante de refugar les alegaciones presentaes por Unidá Nacionalista Asturiana contra la Zona d'Actividaes Loxístiques y Industriales d'Asturies, que va asitiar en Serín y San Andrés. Les alegaciones taben basaes na "falta d'estudiu d'impactu estructural sobre les poblaciones adyacentes, la so afección sobre la Zona d'Especial Protección pa les Aves (ZEPA) del banzáu de San Andrés y pol estudiu de les alternatives a les escoyíes por mor que nenguna d'elles cumplía los requisitos mínimos pa ser zona loxística".

Según la UNA "les respuestes del Conceyu omiten referencia alguna a la falta del perceptivu estudiu d'impactu estructural sobre los núcleos de población y lo único que mencionen respective a la viabilidá de les alternatives ye qu'asina fueren aprobaes pola Conseyería de Mediu Ambiente y pola CUOTA". Tamién inclúi na respuesta'l párrafu nel que la Conseyería de Mediu Ambiente afirma que nun habrá afección a la ZEPA por cuenta que'l banzáu queda fuera del alcance de la obra.

Énte esta respuesta'l portavoz de mediu ambiente d'Unidá Nacionalista Asturiana, Tino Fernández, afirma que "les infraestructures siguen faciéndose mal dende l'entamu, saltándose los trámites preceptivos; depués habrá retrasos, cambios de planes d'última hora, sentencias xudiciales desfavorables y echaráse la culpa a quienes quiximos facer les coses bien dende l'entamu".