Más de 150 participantes y nueve grupos de folk tomen parte nel IX Campeonatu Nacional de batéu d'oru de Navelgas

Más de 150 bateadores d'oru de casi toles comunidaes autónomes, y dalgunos países estranxeros, van tomar parte esti fin de selmana nel novenu Campeonatu Nacional d'esta modalidá, que va acoyer la villa tineana. L'eventu deportivu inclúi na so programación el décimu 'Concursu Folk Cuartu de los Valles', cola actuación de grupos de diferentes zones del Estáu, amás de la celebración, el domingu, del Festival Vaqueiru.

   El campeonatu presentólu en rueda prensa'l presidente de l'asociación de bateadores Barciaecus, César Castaño, y el conceyal de Turismu del Ayuntamientu de Tinéu, César Da Rocha. L'actu tuvo llugar nel salón cultural de Caxastur, entidá patrocinadora de la competición.

   El sábadu día 25 van tener llugar demientres tola xornada les series clasificatories, y el domingu, de magar les 16.00, van ser les finales. Los participantes deberán atopar pebides d'oru nun cubu d'arena de 20 kilos. Los que llogren realizalu nel menor tiempu posible van pasar a les siguientes fases.

   Castaño mostró'l so deséu de contar con numberosu públicu, y destacó l'afitamientu qu'al so xuiciu va algamando esta tradición na zona de Navelgas. Espresó tamién la so satisfaición pol resultáu del Campeonatu del Mundu, celebráu na población el pasáu añu, y que contó con particiipantes de 32 países. Adelantó nesti sen, que nun plazu de cinco a siete años esperen volver acoyer esta prueba nel pueblu tineanu.

   La programación inclúi tamién, pal vienres, un desfile de participatnes y la inauguración de la esposición fotográfica sobre'l pasáu campeonatu del mundu.

CONCURSU DE FOLK

   El concursu de folk Cuartu de los Valles va celebrase en Navelgas demientres les nueches del vienres y el sábadu, como actividá complementaria al campeonatu. Van participar na modalidá de pequeñu formatu Héctor Braga (Asturie), Milo Ke Mandarini (Toledu) y Ondara (Barcelona), mientres qu'en gran formatu los concursantes van ser Amanida Fok (Barcelona), Els Berros de la Cort (Gerona), Toques do Caramulo (Agueda/Portugal) y La Brujata Gata (Madrid). Les actuaciones van celebrase'l sábadu por esi orde, dende les 18.00 hasta la 1.00 hores. El vienres va haber un conciertu folk, a cargu de los grupos Llangres (Asturies), Korrontzi (País Vascu) y Cambera'l Cierzu (Cantabria).

   Amás, el domingu pela mañana va celebrase na braña d'Aristébanu'l festival Vaqueiru, fiesta declarada d'Interés Turísticu Internacional, que representa'l mou de celebración d'una antigua boda vaqueira, y que va incluyir una comida con menú vaqueiru y actuaciones de grupos folclóricos de baile y danza.