La Conseyería de Mediu Ambiente confirmó la existencia de dos exemplares d'osu pardu cantábricu nacíos de la comunicación xenética ente les poblaciones oriental y occidental. La comunicación ente poblaciones ta considerada como una de les grandes claves pa la conservación de la especie a llargu plazu. Esta identificación foi posible gracies al llabor fecho pol equipu de la Facultá de Biolóxiques de la Universidá d'Uviéu dirixíu pola doctora Ana Domínguez, en collaboración dende 2004 cola Conseyería.

Esti equipu fixo l'análisis del ADN que permitieron identificar a dos esbardos híbridos, de ma oriental y pá occidental. Recoyéronse dos muestres con material xenéticu nel Parque Natural de Redes el 18 de payares de 2008. Ún d'ellos foi reconfirmáu por otra muestra tomada en primavera de 2009 dientro del Parque Nacional de los Picos d'Europa, esta última en Lleón. Estos exemplares, ún d'ellos machu y l'otru de sexu desconocíu al nun poder determianse nes pruebes, son hermanos y descendientes del machu migrante de la población occidental atopaú na oriental, nun conceyu palentín, nel añu 2005, y d'una fema de la vertiente cántabra del Parque Nacional.