Xuventú Asturianista celebra un homenaxe y presenta nueva imaxe

|

Xuventú Asturianista celebra esti xueves, un “Homenaxe a los escritores en llingua asturiana, pola oficialidá”, na Llibrería Alborá de Xixón. Amás, van presentar la so nueva imaxe.

La organización moza del Partíu Asturianista anova la so imaxe con un llogotipu nuevu que va desvelase nel actu d’esti xueves 6 de mayu, a partir de les 19:30 hores. Nel actu va celebrase un recital d’autores asturianos y xente representativo de la cultura asturiana, lleendo les sos propies creaciones y otres obres de los nuesos clásicos. El recital va cuntar con un intermediu musical de cantares asturianos.

Xuventú entiende que “ye de xusticia facer un homenaxe a los escritores qu’a lo llargo de tola historia y dende Antón de Marirreguera, primer escritor conocíu n’asturianu, vienen sofitando’l caltenimientu de la nuesa llingua ya identidá”.

Amás, nel actu va desvelase la nueva imaxe de Xuventú Asturianista, qu’anova’l llogotipu coinciendo col 25 aniversariu del PAS, que se celebra esti añu. “Una imaxe más moderna y dinámica que vien a actualizar la imaxe pública de la organización moza asturianista con más años d’actividá”, señalen.
 
L’actu, que se celebra na viéspora del Día de les Lletres Asturianes, y de la manifestación pola oficialidá, na que van participar tanto’l PAS como Xuventú Asturianista, va sirvir tamién pa la presentación de la campaña pola oficialidá, que va repartise na manifestación, y que va cuntar tamién con un audiovisual, que s’estrena nel actu tamién.

Xuventú Asturianista convida a tola sociedá asturiana a sumase a esti homenaxe y a participar de la manifestación qu’esti vienres va percorrer les cais d’Uviéu, “pa recordar al Gobiernu d’Asturies, formáu pola FSA-PSOE ya Izquierda Unida-Bloque por Asturies, y al PP, que l’asturianu tien que tener l’estatus d’oficialidá, como derechu irrenunciable de tolos asturianos”.
 

Contador Estadistiques