La XPDLA critica la "manera de celebrar les lletres d'Areces y Vega"

|

La Xunta pola Defensa de la Llingua llamó a sumase a la manifestación pola oficialidá d'esti vienres, al empar que criticó les declaraciones d’Areces y Consuelo Vega contra la oficialidá.

La organización presentó güei en rueda de prensa la manifestación que va pidir la oficialidá del idioma del país el próximu vienres 7 de mayu, Día de les Lletres Asturianes. Nel actu tuvieron presentes el voceru de la Xunta, Carlos Pulgar, y la militante de la organización María Xosé Martínez.

La convocatoria entamará na Estación del Norte d’Uviéu y finará delantre del Teatru Campoamor, onde va lleese’l comunicáu de la organización. La manifestación va abrise coles pandereteres qu’abrieron l’añu pasáu, les mesmes qu’interpreten ‘El Ramu del Día de les Lletres’, single de 2010 del coleutivu de Músicos pola Oficialidá. Pulgar fixo un llamáu a la participación a pesar de la metereoloxía anunciada, “habrá qu’arreglase con paragües”.

La Xunta quier marcar asina, “como vien faciendo dende 1987”, el Día de les Lletres como una fecha reivindicativa sobre l’estatus llegal del idioma del país; “ye una xornada de fiesta pa la lliteratura del país pero tamién ye momentu pa facer balance y pa reivindicar un estatus d’igualdá pa tola xente que quier usar l’asturianu como la so llingua de cada día”, señaló’l voceru de la Xunta.

La organización quixo recordar casos como los del ciudadanu al que-y negaron el derechu de dirixise a l’Alministración n’asturianu, la presencia testimonial del idioma nos medios públicos, la curtia presencia de la toponimia tradicional yá oficializada, la precariedá de los servicios de normalización municipales, la testimonial política llingüística del Principáu o la curtia presencia del idioma nes escueles. “Ye necesario un marcu llegal d’oficialidá que garantice que les polítiques llingüístiques y los derechos ciudadanos nun dependan de la interpretación más o menos arrogante d’un Gobiernu o d’un xuez”, apuntó Carlos Pulgar.

Carlos Pulgar tamién quixo recordar “la manera peculiar de celebrar la Selmana de les Lletres” del presidente del Principáu y de la Directora Xeneral de Política Llingüística con argumentos afitando que la oficialidá nun tien el sofitu de la sociedá. “Tolos estudios sociollingüísticos amuesen qu’hai una mayoría que la sofita, ye mui triste que salgan esta selmana de celebración poniendo mentires na boca de la sociedá”, dixo pa finar.

 

Contador Estadistiques