Asturies perdió 329 autónomos dende xineru

El númberu d'autónomos afiliaos a la Seguridá Social sigue menguando n'Asturies. Asina, de 79.258 afiliaos de xineru, pasamos a 78.929 n'abril, un total de 329 autónomos menos.

Sicasí, la Confederación Nacional d'Autónomos y Microempreses apuntó que la perda de trabayadores por cuenta propia de marzu a abril namás esperimentó seis baxes. Pero Asturies sigue representando una parte bien pequeña del colectivu d'autónomos españoles, apurriendo namás el 2,5 por cientu del total.

Según los datos publicaos pol Ministeriu de Trabayu y Inmigración, la Seguridá Social rexistró 2.764 trabayadores autónomos más n'abril con respecto al mes pasáu, de lo que se deduz que cada día rexistráronse 92 autónomos más nel Réxime Especial d'Autónomos de la Seguridá Social (RETA), que queda con 3.137.430 trabayadores per cuenta propia.
  
D'esta cifra Conae destaca'l comerciu como l'actividá na que'l coleutivu ta más representáu, con 782.548 persones, esto ye, el 24,9 por cientu del total d'afiliaos al RETA. Síguelu la hostelería, con 321.756 autónomos y l'agricultura, ganadería, caza y pesca, con 285.920.
  
El presidente de Conae, Salvador García Torrico, aseguró que "anque son datos positivos, hai que tener en cuenta la importancia de la Selmana Santa como causa principal de reactivación de sectores como'l comerciu y la hostelería". Por ello, "nun hai que detenese ante un datu positivu, porque lo que buscamos ye la meyora continua y constante de tolos sectores económicos, non repiques que pudieren ser pasaxeros", acaba García Torrico.