Los informativos de TPA batieron el so récord el miércoles 16 de xunu, por mor de les llenes. Los asturianos prefirieron la información na tarde del estrenu de la Seleición Española.

La información y l'actualidá, llograron los meyores resultaos dende l'entamu de les emisiones va cuatro años. ‘TPA Noticias’ marcó na so primer edición un máximu en términos de share con un 30,9% y un 42,5% nel minutu d'oru. El resultáu asitia al informativu como'l más vistu dende l'entamu de les emisiones de la canal.

Elena Espinosa afirmó que la próxima xunta del Conseyu de Ministros va valir p'aprobar ayudes específiques pa les zones afeutaes. Mientres, el 112 yá desactivó’l PLANINPA.

La conseyera de Cultura y Turismu, Mercedes Álvarez, dixo que les cueves prehistóriques del Principáu, "tán en perfectu estáu", tres les incidencies causaes ayeri pol temporal.

El coordinador d'IU y parllamentariu, Jesús Iglesias, anunció güei la intención de la so coalición de facese "más plural, más abierta, con más elementos y persones".

XEGA falló güei'l premiu añal 'Triángulu Rosa', que recayó nel Comité d'Empresa de 'Idees en Metal', pol so sofitu a una trabayadora mientres el so procesu de reasignación sexual.

Según esplicó'l coordinador de XEGA, Mané Fernández Noriega, esti galardón reconoz l'actitú favorable haza lesbianes, gais, transexuales y bisexuales. Amás, la organización premió a Emma Blanco nel concursu de cartelos que convoquen cada añu.

Los alumnos asturianos de primaria son los que más competencia llingüística tienen de tol Estáu. Amás, son los terceros que meyores aptitúes muestren en matemátiques.

Güei entamó la sesta edición de “Miraes”, empobinada pola Asociación Profesional de Fotoperiodistes Asturianos y que con 95 imaxes ufierta una visión de l'actualidá asturiana.

La Conseyera de Cultura y Turismu, Mercedes Álvarez González, participó na inauguración, nel Palaciu del Conde Toreno, n'Uviéu, de la VI Esposición ‘Miraes 2010’. Al actu tamién asistieron la Direutora Xeneral de Política Llingüística, Consuelo Vega Díaz, y el Director del Institutu Asturianu de la Mocedá, Guillermo Martínez Suárez, ente otres autoridaes.

El Conseyu de Ministros israelín votó güei xueves a favor de rebaxar el bloquéu de la Faza de Gaza y de permitir la entrada de más productos d'usu civil.

Once conceyos aragoneses van presentar mañana un recursu d'inconstitucionalidá contra la Llei de Llingües por entender que tán invadiéndose competencies municipales.

Los académicos gallegos correspondentes del Navia-Eo, As Portelas y Valle de Xálima, sofiten la propuesta de dedicar el Día das Letras Galegas al berzianu Antonio Fernández Morales.

L’académicu  correspondiente d’El Bierzu de la Real Academia Galega, Héctor Silveira, remitió a la institución la solicitú formal pa que l’escritor bercianu Antonio Férnandez Morales seya l’autor homenaxeáu nel Día das Letras Galegas de 2011.