Israel decide rebaxar el bloquéu a Gaza

|

El Conseyu de Ministros israelín votó güei xueves a favor de rebaxar el bloquéu de la Faza de Gaza y de permitir la entrada de más productos d'usu civil.

Esto vien depués de recibir numberoses crítiques a nivel internacional por atacar el pasáu 31 de mayu la a la flota que pretendía llevar ayuda a esti territoriu palestín, causando la muerte de nueve activistes turcos.
  
"Alcordóse lliberalizar el sistema pol qu'entren bienes civiles en Gaza y aumentar la entrada de materiales pa proyectos civiles que tean baxo supervisión internacional", diz un comunicáu oficial que nun precisa a qué productos se refier. El comunicáu nun fala en nengún momentu de llevantar el bloquéu marítimu. Esti anunciu paez indicar qu'Israel va dexar qu'organizaciones internacionales como la ONX importen materiales qu'antes taben prohibíos y que son fundamentales pa la reconstrucción de Gaza dempués de la guerra del iviernu del 2008-2009.
  
El Conseyu de Ministros, qu'empezó ayeri los sos debates sobre la posibilidá de suavizar l'embargu, señaló que van siguir aplicándose "los procedimientos de seguridá actuales pa torgar la entrada d'armes y material bélicu" nel territoriu costeru, gobernáu pol movimientu islamista Hamás. Israel impunxo'l bloquéu pocu dempués de que Hamás ganare les elecciones lexislatives palestines del 2006 y endureciólo cuando esti grupu tomó'l poder en Gaza, nel 2007.
 
Masip pide crear "un tribunal moral" frente a Israel
 
L'eurodiputáu socialista asturianu Antonio Masip reclamó ayeri la necesidá de crear nel ámbitu européu "un tribunal moral" y "de prestixu", que pudiere facer frente al estáu "violentu y agresivu" d'Israel. A xuiciu de Masip, Israel ta dando "pasos contrarios a la paz".
  
Asina lo dixo na so intervención nel Plenu del Parllamentu Européu celebráu n'Estrasburgu, onde los eurodiputaos debatieron cola Alta Representante de la XE, Catherine Ashton, l'ataque del exércitu israelín a una flota de barcos con ayuda humanitaria que se dirixía a Gaza'l pasáu 31 de mayu. El xueves, el plenu va votar una resolución al respecto.    
  
Masip dixo qu'Israel "asesinó" a unos "héroes" de la solidaridá humanitaria, de l'arrogancia y del altruísmu. "Animu al Gobiernu palestín a que realice la declaración unillateral d'independencia dientro de les fronteres de 1967", dixo.
  
Amás, consideró que tovía queda muncho qu'investigar, que xulgar y que condenar, más allá d'esa resolución que se va votar mañana. Calcó asina en reclamar la creación d'un tribunal "igual del tipu que nel so día foi'l tribunal Russell de crimes de guerra".

Contador Estadistiques