'Miraes 2010’ fai un repás a l’actualidá del últimu añu

Güei entamó la sesta edición de “Miraes”, empobinada pola Asociación Profesional de Fotoperiodistes Asturianos y que con 95 imaxes ufierta una visión de l'actualidá asturiana.

La Conseyera de Cultura y Turismu, Mercedes Álvarez González, participó na inauguración, nel Palaciu del Conde Toreno, n'Uviéu, de la VI Esposición ‘Miraes 2010’. Al actu tamién asistieron la Direutora Xeneral de Política Llingüística, Consuelo Vega Díaz, y el Director del Institutu Asturianu de la Mocedá, Guillermo Martínez Suárez, ente otres autoridaes.

 L'amuesa consta de 95 imaxes qu'ufierten una visión privilexada de l'actualidá asturiana y dexen recordar munchos de los principales acontecimientos del últimu añu. La mayoría d'eses semeyes foron publicaes na prensa asturiana, anque dalguna tamién tuvo proyección nacional ya internacional.

“La nueva esposición ye un exemplu del bon momentu que vive'l fotoperiodismu asturianu y de la profesionalidá y calidá de los trabayos publicaos”, recuerden dende la Conseyería de Cultura.

L'Asociación Profesional de Fotoperiodistes Asturianos creóse en 2003, añu nel qu'un grupu de fotoperiodistes n'activu decidió buscar la meyor vía pa protexer los sos intereses y dar una mayor promoción a los sos trabayos.

El llabor de l'Asociación Profesional de Fotoperiodistes Asturianos proyéutase más allá d'esta esposición, al conceder una reconocencia especial a la meyor instantánea del añu cola distinción Memorial Ramón González, fotógrafu asturianu fináu n'accidente de tráficu en xineru de 1993.

El fotógrafu avilesín Eloy Alonso, que collabora en numberosos medios de comunicación, resultó premiáu nesta última edición. El Xuráu que concedió la distintición tuvo formáu por: Jon Barandika, editor gráficu de Públicu; Consuelo Bautista, fotoperiodista d'El País; Miguel Riopa, fotoperiodista de France Press; Ignacio Lobo Altuna, editor gráficu d'El Diario Vasco; Andrea Comas, fotoperiodista de Reuters; y Pablo Juliá, director del Centru Andaluz de Fotografía.