TPA algama’l so meyor datu n’informativos poles llenes

Los informativos de TPA batieron el so récord el miércoles 16 de xunu, por mor de les llenes. Los asturianos prefirieron la información na tarde del estrenu de la Seleición Española.

La información y l'actualidá, llograron los meyores resultaos dende l'entamu de les emisiones va cuatro años. ‘TPA Noticias’ marcó na so primer edición un máximu en términos de share con un 30,9% y un 42,5% nel minutu d'oru. El resultáu asitia al informativu como'l más vistu dende l'entamu de les emisiones de la canal.

L'espaciu lideró'l so horariu perriba de TVE1 (26,1%), de les Temátiques (14,8%), Tele 5 (10,7%), Antena 3 (7,3%), La Sexta (4,5%), Cuatro (2,9%) y La 2 (0,1%). Amás, ye de reseñar que tolos cadenes de la FORTA (Federación d'Organismos de Radiu y Televisión Autonómicos), amás d’Antena 3 y La Sexta, emitieron imaxes de les llenes tomaes por TPA.

El lideralgu d'audiencia estendióse tamién al programa ‘Conexión Asturias’, daqué especialmente relevante nuna tarde na que se xugaba'l primer partíu de la Seleición Española nel Mundial de Fútbol.  El magacín algamó un 21,3%, dos puntos más que la segunda cadena más vista: Tele 5 (18,2%).

TPA 2 ‘récord’ col 1,6%

A estos rexistros hai qu'añadir los llograos por TPA 2 (A8), la segunda canal de la televisión autonómica. Esta canal, que redifunde una hora más tarde la programación de TPA 1, marcó, con un 1,6%, récord na xornada y el segundu más altu absolutu dende qu’entamó les sos emisiones va dos años.