La deuda del Principáu d'Asturies aumentó un 40,3 por cientu nel segundu trimestre del añu (376 millones) en comparanza con igual periodu del 2009, hasta rexistrar 1.309 millones d'euros, la cifra más alta de tola serie histórica.

La organización independentista de mocedá Darréu vien d’amosar nun comunicáu la so solidaridá colos “compatriotes mineros” d’El Bierzo y L.laciana. El colectivu denuncia les “inxusticies” d’empresarios y gobiernu del Estáu español.

Roberto Colunga, diputáu del BA y Portavoz del Grupu Parllamentariu Mestu, presentó con carácter d’urxencia una Proposición Non de Llei na Xunta Xeneral pa qu’esta dea una respuesta unitaria a les “agresiones” del Gobiernu español.

Esta Proposición Non de Llei con carácter d’urxencia, tien l’oxetivu d’abrir un debate parllamentariu qu’inste al Conseyu de Gobiernu a dirixise al Gobiernu d’España pa esixi-y la financiación adecuada y un calendariu completu, con feches y plazos, pa la conclusión de toles infraestructures asturianes.

La quinta edición de L’Arribada da empiezu güei en Xixón. Pasucais con gaita, un homenaxe a la poesía asturiana, con llectura de testos por representantes sociales y políticos, una proyección y música en vivo, arranquen l’eventu.

La Banda de Gaites de Corvera ye la encargada de dar el pistoletazu de salida de l’Arribada 2010 nel Puertu Deportivu de Xixón. A esto sígui-y l’actu institucional d’inauguración, a les 18 hores nel Antiguu Institutu de Xixón, y la proyección del documental n’eonaviegu “A bruxa de Brañavara” a les 18.30.

Yá ta na cai la primer referencia discográfica de Misiva, una de les nueves bandes de rock n’asturianu. A ritmu punk-rock, con mensaxe reivindicativu y protagonismu compartíu del asturianu y castellanu, asoleya “Parte de la solución”.

El sindicatu d’enseñanza SUATEA califica nun comunicáu de “Fuera de la Llei” la situación del asturianu na enseñanza. Denuncia que nun se cumple la Llei d’Usu en cuantes a la ufierta de l’asignatura y la precaria situación del profesoráu.

Unidá Nacionalista Asturiana vien de criticar les polítiques de Noemí Martín, Conseyera de Vivienda, na xestión d’esta materia materia. Según los nacionalistes “l’anunciáu axuste del preciu de la vivienda nun se produxo n’Asturies”.

Daniel Fernández, voceru de vivienda d’UNA, denunció, en base a los datos del INE, que’l preciu actual de la vivienda yá ye superior al del entamu de la crisis inmobiliaria. Amás, señaló que “mentantu la vivienda baxó 8’5 puntos a nivel estatal, n’Asturies xubió 0’5 puntos dende’l 2007”, polo qu’argumenta que nun se dio l’axuste de preciu.

El 14,3 % de la población d'Estados Uníos, esto ye, 43,6 millones de persones, vive perbaxo de la llenda de la probitú, según los datos daos a conocer esti xueves pola Oficina del Censu referentes al 2009.