El 14% de los estadounidenses vive baxo la llenda de la probitú

El 14,3 % de la población d'Estados Uníos, esto ye, 43,6 millones de persones, vive perbaxo de la llenda de la probitú, según los datos daos a conocer esti xueves pola Oficina del Censu referentes al 2009.

La xuba de la probitú, constitúi un aumentu de cuatro millones sobre'l 2008, cuando había un 13,2%. Pola llenda de la probitú entiéndese a aquelles families de cuatro miembros qu'ingresen 22.050 dólares.
  
Según estos datos, el nivel de probitú aumentó en tolos grupos raciales, nun siendo ente los asiáticos. El director de la oficina de Vivienda y Families de la División d'Estadístiques Económiques, David Johnson, precisó que'l númberu de probes podría ser mayor si nun fuere porque reculó ente la población de mayor edá, pasando al 8,9 dende'l 9,7 por cientu.
  
Coles mesmes, según la CNN, señaló que l'aumentu nos subsidios por desempléu fizo que más persones salieren de la probitú, eso pese a que la tasa de paru pasó del 7,7% a primeros d'añu al 10%.
  
Por rexones, el sur sigue siendo la zona más probe del país, con un índiz del 15,7 por cientu. Equí foi onde se produxo un mayor aumentu sobre l'añu anterior, cuando había un 14,3 por cientu de persones que vivíen baxo la llenda de la probitú del oeste, el nivel ye del 14,8 por cientu de la población, mientres que nel Mediu Oeste ye del 13,3 y nel nordés del 12,2 por cientu.
  
Por estaos, Mississippi ye'l más probe del país, dao que'l 20,6 por cientu de la so población vive perbaxo de la llenda. Sígenlu Arizona, con 19,6 por cientu y Nuevu México col 19,3 por cientu. Pela contra,  New Hampshire ye l'estáu onde hai menos probes, dao qu'estos namás representen el 7,3 por cientu, mientres que Connecticut tien el 8,3% y Utah el 8,6%.
  
Per otra parte, según la Oficina de Censu, el númberu d'habitantes sin seguru médicu aumentó a 51 millones, frente a los 46 millones del 2008. El númberu d'adultos sin seguru aumentó, mientres que'l de menores baxó.