Cuatro diputaos de la Xunta Xeneral del Principáu d'Asturies van secundar la fuelga del 29 de setiembre y van destinar la retribución parlamentaria d'esi día a distintes causes. Son diputaos d’IU-Los Verdes y del Bloque por Asturies.

El Ministeriu d'Igualdá elevó a 52 el balance mortal de la violencia de xéneru no que va d'añu, ocho más que nes mesmes feches del 2009 y una más que nel mesmu periodu del 2008, l'añu con más víctimes.

Ecoloxistes n'Aición d'Asturies señaló que'l Ministeriu de Mediu Ambiente y Mediu Rural y Marín solicitó a l'Autoridá Portuaria de Xixón un informe sobre'l supuestu usu de materiales sin contemplar na Declaración d'Impactu Ambiental.

El Diputáu del Bloque por Asturies, Robert Colunga, pidió la comparecencia Urxente del Conseyeru d'Ondustria y Empléu y del Director Xeneral del IDEPA pa qu’informen con detalle sobre la situación de la empresa Venturo XXI.

El día 25 presentóse en Zaragoza Espacio Plural. Ye esti un proyectu políticu que sumando fuerces nacionalistes, ecoloxistes y d’izquierda de dellos llugares del Estáu, quier dar una respuesta al “bipartidismu y les polítiques de derecha”.

Chunta Aragonesista (CHA), Catalunya-Verds (ICV), Iniciativa pel Poble Valenciá, Paralelo 36 d’Andalucía, Iniciativa d’Esquerres (Baleares) y Nueva Canarias, son les principales organizaciones que formen Espacio Plural, un proyectu que se define como foru d’alderique y que pel momentu nun se va presentar a les elecciones estatales.

El xefe de campaña del Partíu Socialista Uníu de Venezuela (PSUV), Aristóbulo Istúriz, reconoció que la so formación nun algamó los dos tercios d'escaños a qu'aspiraba, pero calificó la victoria de "contundente" pola mayoría absoluta.

"La meta yera de 110 diputaos. Nun mos foi posible llogralo, sicasí llogremos 95 diputaos, una mayoría contundente, una victoria contundente", declaró, citáu pol diariu venezolanu 'El Mundo'. La Constitución establez que pa l'aprobación de nueves lleis requierse una mayoría cualificada de dos terceres partes de los parlamentarios.

El conceyal de Cultura d'Uviéu José Suárez Arias-Cachero desmarcóse de la posición del alcalde, Gabino de Lorenzo, y pidió públicamente a Mariano Rajoy que se decida por Francisco Álvarez-Cascos como candidatu n'Asturies.

Nuna carta abierta a Rajoy que publica güei'l periódicu El Mundo, recoyida por Europa Press, Arias-Cachero diz que la xunta del vienres na que dellos cargos públicos del PP, incluyíu De Lorenzo, propunxeron a Isabel Pérez-Espinosa como candidatu, prodúxose "al marxe de los órganos del partíu".

Mediu centenar de cicloturistes dieron cita en La Pola L.lena pa participar en Marcha Cicloturista Puerta d'Asturies “Xubida al Gamoniteiru” qu'entamó'l Club Ciclista Puerta d'Asturies.

Cicloturistes de Madrid, Galicia, País Vascu, Castiella Lleón y de munchos clubes asturianos esfrutaron d'un día perafayadizu pa la práctica d'esti deporte, nes carreteres del conceyu de L.lena.

L’asociación cultural del Eo-Navia Xeira, convoca otru añu más el concursu más conocíu y antiguu de lliteratura en gallego-asturiano. Amás esti añu, el Premio Xeira de Narracióis Curtias destaca por llegar a la so XX edición.

Col enfotu de promocionar el gallego-asturiano na so espresión culta, Xeira escomenzó a organizar va venti años esti concursu de narraciones curties. Pola mor d’ello, l’asociación llama a participar a tola xente “interesada en fer una lliteratura na llingua dos conceyos máis occidentales d’Asturias”, destacando los venti años de trayectoria.