Gonzali: “Nun ye raro ver cargos públicos del PP falando n'asturianu”

Humberto Gonzali (Mieres, 1961) ye escritor, políticu y xestor cultural. Una de les sos iniciatives venceyaes asturianismu cultural ye L’Arribada, de la que ye coordinador. Tamién ye militante del PP. Na entrevista afonda nestos dos campos.

L’Arribada ye anguaño una fecha abondo conocida nel mundu de la cultura asturiana, pero yá pasaron cuatro años dende la primer edición. ¿Pue señalanos cómo, por qué y pa qué surdió esti proyectu?
L’Arribada nació pola necesidá d’afayar un marcu abiertu, dinámicu, multidisciplinar y útil pa llograr que la realidá y los nomes de les nuestres lletres llegaren con facilidá non solo a los llectores avezaos, sinon también al restu la ciudadanía, tantu de Xixón como del restu d’Asturies, ansí como que tuvieren una puerta desatrancada p’averase al restu les comunidaes autónomes. Pa ello afitamos espacios onde tol mundu pue facer actu de presencia, y participar nos debates, nos recitales, nes estremaes actividades creatives. En definitiva, fai yá un llustru un piñu persones enfotámonos n’esbrexar nun camín pa la nuestra lliteratura nel que pudiéremos andar cola compaña de xente del conceyu, d’Asturies, d’otros llugares del mundu.

¿Qué valoración fai del eventu en too esti tiempu?
Home, a estes altures L’Arribada ye l’eventu asturianista, non entamao pola Alministración, que tien más relevancia y proyección d’ente los fechos na nuestra comunidá autónoma. Eso ye per sí un éxitu. Y tamos emperraos en progresar y en facelo a rau restalláu.

Lliteratura, esposiciones, cine, música, meses redondes, teatru… tán presentes en L’Arribada y too ello n’asturianu dafechu. Paez que tenemos una llingua bastante multidisciplinar; pero ¿Considera qu’hai dalgún campu pel que l’asturianu tenga que pasar pa que s’esparda d’un mou más granible ente la sociedá?
La llingua del nuestru país habría tar en toles partes, ufiertando exemplos de presencia a tente bonete. En considerando esto, igual nesta estapa del procesu de normalización onde nos afayamos tendríemos de destacar una estaya; la de los medios de comunicación y, mui en particular, la televisión. Que la televisión autonómico d’Asturies tuviere, a lo menos, un usu asemeyáu del asturianu y del castellanu na programación, diba llograr más pol prestixu de la llingua que bien de campañes reivindicatives. Y qu’esi usu llegare a programes xeneralistes, a los informativos, y a los telefilmes y llargometraxes, diba entainar de toes toes esa recepción dende la normalidá que munchos asturianos tovía nun tienen.

¿Y cómo se valora un eventu d’esti calter acuyá de les llendes del asturianismu cultural?
Pues la verdá ye que mui bien. Supimos tayar pela freba con ensi inclín del asturianismu cultural por entamar actos ente lo endogámico y lo aburrío por demás. Si suponemos no que nomamos “asturianismu cultural”  un conocimientu abondo la nuestra cultura (nun sé yo si sedría munchu suponer), entós tendremos d’articular mecanismos p’avera-y al común de la xente esa bayura  de productos culturales cola que cuntamos n’Asturies y que de cutiu pasen desapercibíos. L’Arribada llogra enllenar los llocales de persones varies vegaes en cada edición del eventu. Y créame, ver una sala apinada de xente onde malapenes topes a dalgún conocíu, ye la meyor prueba de que los nuestros enfotos tán llegando a bon puertu y que l’oxetivu cimeru L’Arribada, la popularización de la lliteratura y la llingua llariegues, ta lográndose pasu ente pasu.

En cuantes a la edición d’esti añu; ayeri arrancó VAGAMAR, pero PER ASTURIES  y ROLDA son les otres dos estayes de L’Arribada 2010. Entá nun se fizo pública la programación d’estos actos, ¿Pue danos más información?
Sí. Zarramos alcuerdos de collaboración con Corvera, Colunga y Villaviciosa, y tamos a piques de zarralo con Tapia, no tocantes al Per Asturies d’esti añu; maque también-y avanzó que, con vistes al 2011, tenemos pendientes a Ribesella, Llangréu y Cangas del Narcea. Como ye normal, tamos tovía dándo-y vueltes, en xunto cola xente d’esos conceyos, a les actividades que vamos enxertar nes programaciones. Pueo comenta-y que nel casu Corvera, onde vamos tar al empiezu d’ochobre, dedicarémos-y espacios al deporte na lliteratura, habrá presencia d’autores del llugar y un homenaxe a una corverana, y falaráse del cine fantaterroríficu y la so rellación cola obra d’escritores clásicos y non tan clásicos. Nesti últimu marcu proyectaráse’l primer llargumetraxe dobláu al asturianu, La nueche de los muertos vivientes. Nos otros conceyos entamaránse actos de toa mena, dende presentaciones lliteraries a proyecciones de material audiovisual, pasando per conferencies y ponencies y actuaciones musicales. De tou ello, vamos dir avanzando información en cuantes los programes vayan perfaciéndose.

Acabemos con L’Arribada con un tema cuasi inevitable del qu’entrugar. Instituciones públiques y medios de comunicación son vitales pa echar palantre proyectos d’esti calter. ¿Con L’Arribada cómo se tán portando?
Ye verdá que l’aportación público resulta bien importante pa la viabilidá de proyectos como’l de nós, pero pa esto hai muncho más. Lo que xente abondo nun sabe ye que miembros de la directiva de L’Arribada ponen, pal desarrollu de la iniciativa, dellos miles d’euros tolos años. Y amás d’ello, hai empreses y particulares que collaboren d’un mou notable. Con esto quiero que nos decatemos d’aquello que calteriza a L’Arribada. Falamos d’un exemplu, más que dignu, de participación y compromisu de sociedá civil pa cola nuestra lliteratura y cultura. Vese a les clares que l’ayuda de les alministraciones publiques ye básico, cómo non, pero apuestes culturales como ésta, entamaes con esti xeitu, son impensables ensin contar col gabitu de munches persones, entidaes y empreses que son les conformadores de la sociedá civil. En cuantes a los medios de comunicación, son la tercer pata d’esti tayuelu, xunto cola Alministración y la sociedá civil. De lo que nun se comunica nun se fala. Cómo y cuánto digan de nós los medios de comunicación va determinar muncha de la sonadía del trabayu que faigamos. Nesti capítulu permítame qu’allabe’l compromisu informativu de los dixitales n’asturianu, como Asturies.com, pa con tolo venceyao a la realidá llingüística del país y a la cultura propio.

Cambiando agora un pocoñín de temática y en rellación a la so persona. Usté ye un asturianista militante del Partíu Popular ¿Por qué decidió militar nun partíu d’un calter centralista? ¿Cómo ven los sos compañeros al asturianismu?
Ser, soi asturianista, y soilo de cuantísimayá. Tengo escrito’l mio primer poema n’asturianu (malu por demás) con dolce añinos, allá pel 1973. Neso soi más que vieyu. No ideolóxico, afayéme nel pensamientu lliberal nel empiezu la década los ochenta y, en 1994, determiné en allugar la mio xera política nel Partíu Popular d’Asturies. 
Permítame que lu contradiga no de “calter centralista”. Pelo contrario. El PP ye un partíu autonomista; nun defende’l calter centralista del estáu. Faigo recordanza d’un datu non menor. Cuando se discutía la vía d’accesu al procesu atonómicu pa la nuestra comunidá, AP esixó qu’esta se ficiera pol mesmu artículu que valió pa les denomaes d’aquella  “nacionalidaes históriques” y p’Andalucía. Per otra parte, un importante relevu xeneracional dientro de les xuntes, la esperiencia de gobiernu n’otres comunidaes bilingües, y la presencia cada día más notable de militantes asturianistes, vieno faciendo que’l PP asumiere amodo la personalidá llingüística y la fuerza identitaria d’Asturies. Agora mesmo nun ye raro afayar cargos públicos populares, dende diputaos a conceyales, que falen n’asturianu con absoluta normalidá o que se posicionen como asturianistes, y pa nada nun-y choca tala cosa a nengún.

No cincante a la so militancia, paez que tán les coses revueltes ente los “populares”. El desenlace col tema de Cascos… ¿Va sabese dalgún día? ¿Qué opinión tien sobre’l tema?
Mire, nesti tema’l PP asturianu faló bien claro, dende la llexitimidá democrática que tien, xurdida de los procesos congresuales, y col apoyu d’un númberu de xuntes locales qu’axunten más del 80% de la militancia.
El PP d’Asturies, en consonancia col PP estatal, quier un perfil de candidatu o candidata d’una xeneración determinada, d’amplia experiencia político y que puea representar na nuestra comunidá autóma lo que Basagoiti nel País Vascu, lo que Feijóo en Galicia, o lo que Dolores de Cospedal, Esteban González Pons y Soraya Sáez de Santamaría nel ámbitu del estáu. Nel mio casu, yo soi un home de partíu.

Y en materia de llingua ¿Cómo s’anda pel PP? Hai xente qu’opina que la oficialidá, si llega, va venir de la mano del so Partíu…
Nesto soi rotundu. Si cuaya una opción p’abrir la sienda la cooficialidá, esa opción saldrá d’un gobiernu autonómicu del Partíu Popular.

Na so páxina web rescampla una frase de Manuel Fraga que diz qu’hai que trabayar xuntos o sinon diráse “a ó carallo”. Tanto que se fala de la Xuntanza del asturianismu políticu ¿Qué piensa d’ello? ¿Habrá, ente otres coses, diputáu nacionalista pal 2011?
Yo, que nun veo mal qu’haya una opción nacionalista con presencia institucional nel nuestru país, también-y digo qu’esto nun ye nada fácil. Y ello, en gran midida, pola mor de la “idiosincrasia” del propiu nacionalismu asturianu. Yo milito nun partíu onde los desencuentros puen ser perduros pero, llegaos al momentu les elecciones, tenemos el más altu grau de fidelidá ente los nuestros votantes. La nuestra bas electoral ye mui sólida. Paezme, y dígolo viéndolo dende fuera, que remedando ‘La vida de Brian’ nun se va a nenguna parte. Si tolos nacionalistes, toos, nun s’axunten baxo una sigla, y con tiempu abondo enantes de la viniente xornada electoral de 2011, puen escaecese d’algamar esi diputáu.