El partíu de Chávez gana por mayoría absoluta, anque non colo deseáu

|

El xefe de campaña del Partíu Socialista Uníu de Venezuela (PSUV), Aristóbulo Istúriz, reconoció que la so formación nun algamó los dos tercios d'escaños a qu'aspiraba, pero calificó la victoria de "contundente" pola mayoría absoluta.

"La meta yera de 110 diputaos. Nun mos foi posible llogralo, sicasí llogremos 95 diputaos, una mayoría contundente, una victoria contundente", declaró, citáu pol diariu venezolanu 'El Mundo'. La Constitución establez que pa l'aprobación de nueves lleis requierse una mayoría cualificada de dos terceres partes de los parlamentarios.

El presidente de Venezuela, Hugo Chávez, declaró que los resultaos de les elecciones parlamentaries del domingu son "abondo pa siguir afondando'l socialismu bolivarianu y democráticu" y supunxo "una victoria del pueblu".

"Bueno, queríos Compatriotes míos, foi una gran xornada y llogremos una sólida victoria, bastante pa siguir afondando'l Socialismu Bolivarianu y Democráticu. ¡¡Tenemos que siguir fortaleciendo la Revolución!! Una nueva Victoria del Pueblu. Felicítolos a toos", declaró'l mandatariu al traviés de la so cuenta na rede social Twitter.

Victoria a la oposición
Según los últimos resultaos preliminares anunciaos pol Conseyu Nacional Electoral (CNE), y a falta de seis escaños por dirimir, el Partíu Socialista Uníu de Venezuela (PSUV) de Chávez algamó la mayoría absoluta de los 165 asientos en disputa, con 95, mientres que la opositora Mesa d'Unidá Democrática (MUD) llogró más d'una tercer parte, con 64. La participación foi del 66,5 por cientu.
 

Contador Estadistiques