I.Gonzali: “Vamos rodar un llargumetraxe dafechu n’asturianu ”

Illán Gonzali (Xixón, 1990) ye realizador audiovisual. Responsable de la productora independiente Gonzali Producciones, ta acabantes d’estrenar el primer llargumetraxe dobláu al asturianu; daqué no que va siguir afondando.

Vamos arrancar pol principiu ¿Cómo surde la idea de doblar al asturianu “La nueche de los muertos vivientes”?
Cuando entamamos con Gonzali Producciones, fai yá un añu y mediu, nacimos pa facer curtiumetraxes y llargumetraxes de ficción. Pero bono, por delles razones nun empecemos en seriu hasta hai trés meses. Y como hasta ochobre de 2010 nun vamos escomenzar a grabar ficción, miremos a ver que podíemos facer pente medies, y entós surdió la idea del doblaxe. Esta idea ye consecuencia de les películes mudes que yá tornemos al asturianu – Nosferatu, El retorno de la Ópera…- y col tema del doblaxe sentámonos a falar, punxímonos d’alcuerdu y decidimos facelu.

¿Por qué esa película pa entamar col doblaxe n’asturianu?
Equí entra el tema de que ye la primer película que doblamos. Y como toles primeres veces, hai coses que salen bien y mal. Esta ye una película intermedia, los actores son amateurs y nótase na pantalla. Si la analices oxetivamente, “La nueche de los muertos vivientes” ye perfecta pa un primer doblaxe, pa lo bueno y pa lo malo, porque se realizó d’una forma mui parecida a como se fizo’l doblaxe. Por exemplu, la cosa cambia cola segunda película que vamos doblar dientro de nada, que ye “El tercer hombre” de Graham Greene; una película mui seria, con una voz mui determinada. Y lo qu’ocurre ye qu’ehí va haber un tipu de doblaxe que nun s’aplica con “La nueche de los muertos vivientes”, porque tien característiques diferentes.

Otra de les razones pa escoyer esta película pal primer doblaxe ye que ye un clásicu del cine indiscutible y que dio orixen a tol xéneru de zombies que conocemos anguaño.

Nesta producción participaron más de venti persones, paez que’l doblaxe n’asturianu ye daqué que xenera empléu…
Sí, claro. Sobre too n’Asturies onde’l trabayu p’actores ye prácticamente nulo y profesionalizase más difícil tovía. El doblaxe ye una vía más que necesaria pa los actores d’Asturies.

La película doblóse ensin nengún tipu de subvención ¿Cómo s’afronta un proyectu como esti namás que cola autofinanciación?
A ver. Realmente nun ye tan complexu facer el doblaxe, namás hai qu’alcontrar les ferramientes necesaries y a la xente que sepa usales bien. Lo qu’esta película requirió foi munchu trabayu, fueron trés meses en total onde a vegaes llegóse a trabayar 11 o 12 hores al día. Esto ye daqué mui complexu y hai poca xente que lo quiera facer.

¿Crees qu’esistiría la posibilidá de qu’esta producción se reproduxera en dalguna televisión asturiana?
Si que lo creo, pero non namás pa esta producción. Anguaño la xente demostró qu’hai demanda d’esti doblaxe y en cuantes se vea qu’esto tien continuidá, cosa que vamos demostrar dientro poco, yá se va considerar esto como daqué serio. Agora yá esiste la primer película doblada al asturianu, esto ye mui importante, pero cuando falamos d’una serie de películes doblaes yá tamos falando de doblaxe n’asturianu y la cosa cambia. Nesi momentu yá habrá interés de quien tien que tenelu, pero claro, eso ye cosa d’ellos, anque nós vamos poner la mayor intención en que lu tengan. 

Güei foi la presentación pero ¿Ónde más va proyectase “La nueche de los muertos vivientes? ¿Va ponese dempués a la venta o distribuyise de dalguna forma?
Que podamos confirmar va movese a Corvera n’ochobre, a Villaviciosa el 27 de payares, y a Colunga el de payares. Anque hai demanda yá d’otros sitios, pero tovía nun confirmamos nada. En cuantes a la distribución hai demanda de conseguir esta película y les de cine mudu que tornamos l’añu pasáu. Por exemplu esti doblaxe ye mui interesante pa les clases de llingua asturiana, porque los profesores nos dicen qu’en xeneral hai mui poco material col que trabayar, y muncho menos en formatu audiovisual.

Tamién vamos distribuyilo en DVD, colos sos extras, como vamos distribuyir amás per separáu les películes futures que doblemos y les que yá ficimos de cine mudu. La distribución va ser per toa Asturies y al traviés d’estremaos medios, pero bono, eso yá lo veremos nel futuru. Lo que podemos garantizar ye que se va facer en DVD.

Dexando un poco de llau el tema del doblaxe, vamos falar un poconín d’otres coses rellaciones col mundu audiovisual n’asturianu ¿Qué nos pues cuntar sobre Gonzali Producciones?
Bueno, yo soi realizador de cine y siempre quixi facer audiovisuales y Gonzali Producciones naz como una ferramienta oficial pa poder facer audiovisuales. Queremos facer tolo posible: ficción, documentales d’etnografía, doblaxe… facer coses interesantes y de les qu’amás haiga demanda.

Agora mesmu el nuesu interés cimeru a nivel de ficción ye'l llargumentraxe que vamos facer l’añu que vien y que se va rodar dafechu n’asturianu. Tamién a curtiu plazu vamos entamar a finales d’ochobre cola grabación d’un curtiumetraxe en 3D. Tamién vamos siguir colos documentales y colos doblaxes. Hai otros dos doblaxes más en mente, prestaríanos facer cinco, pero pel momentu avánzote’l de “El tercer hombre” de Graham Greene, con Orson Welles y Joseph Cotten y dirixida por Carol Reed. Prestaríanos tamién cuntar con ayuda estra y poder doblar películes más recientes y famoses, pero anguaño nun ta nes nueses manes.

¿Qué oportunidaes tien una productora independiente asturiana pa sobrevivir n’Asturies?
Depende de cómo te muevas. Hai que buscar productos d’interés xeneral y rellacionáu colos productos n’asturianu, buscar coses afayadices pa normalizar. Tamién nós nun nos queremos zarrar namás al asturianu. Por exemplu cuando grabemos ficción va ser billingüe, pa nun pesllanos y sacalo tamién fuera d’Asturies.

El tema de la supervivencia veráse nel futuru, hasta dientro d’un añu o dos nun se te decir en que va quedar la cosa, anque somos optimistes.

Yá que fales de normalizar, nesi sen ye importante la temática ¿Qué te paecen los temes sobre los que xiren les producciones audiovisuales n’asturianu?
Na mayoría de cortos que vi creo qu’hai temes mui locales, mui cerraos; anque hai escepciones. Esi nun ye’l mi tipu de cine y yo prefiero trabayar muncho el guión, facelo con una narrativa visual distinta.

Y pa finar ¿Puedes falanos daqué del argumentu y de les feches d’estrenu de les producciones de ficción que vais facer?
Bueno, mui per enriba pueo falate del curtiumetraxe; de la película tovía non. Va ser una especie de thriller, mediu policiacu, mediu d’investigación, que xira al rodiu d’una serie d’asesinatos. Tamién dicite que va ser en 3D, anque nel sentíu d’un 3D de metese más na arquitectura de les escenes, de ver la distancia de los elementos de les escenes. Ye un curtiumetraxe basáu nel guión, agora vamos entamar cola prepoducción y va proyectase a finales d’esti añu.

Y l’añu que vien vamos rodar la película de llarga duración, cola idea d’estrenase a finales d’esi añu o a principios del siguiente.