El Serviciu de Salú del Principáu d’Asturies (Sespa) realizó 65.515 intervenciones quirúrxiques nel 2010. Esti númberu altu d’operaciones permitió una reducción de la llista d’espera pa entrar en quirófanu del 2,2 por cientu.
 

El tenista valencianu David Ferrer va ser, otra vuelta, la estrella de XXXII Tornéu Banco Herrero-Tenis Playa de Lluanco, qu’esti añu va celebrase del 27 al 30 de xunetu n’horariu de tarde-nueche. N’actualidá, Ferrer ocupa’l númberu 6 del ranking ATP.
 

El PP ganaría güei les elleiciones xenerales al superar al PSOE nun 10,1 por cientu n’intención de votu. Ye’l datu principal del barómetru d’opinión del mes de xineru ellaboráu pol Centro d’Investigaciones Sociolóxiques (CIS).
 

La fábrica de Chacinería Asturiana en Navelgas quedó ayeri destrozada por un incendió que principió a les 3 la madrugada y que Bomberos d’Asturies nun pudo dar por apagáu hasta 15 hores depués del so ainiciu. La empresa, una cooperativa con mercáu n’Asturies y en dellos puntos del Estáu, daba empléu a 12 trabayadores na so planta.
 

El Bloque por Asturies y Unidá Nacionalista Asturiana (BA-UNA), en boca del so candidatu pa les elleiciones autonómiques de mayu, Rafael Palacios, llamentó la oposición del PSOE, IX y PP na Xunta de Voceros de güei a la comparecencia del presidente, Vicente Álvarez Areces, na Xunta Xeneral pa informar sobre les actuaciones de l’Alministración na trama supuesta de corrupción conocida como ‘Operación Marea’. Pa Palacios esto ye un “exemplu claru de partíucracia”.

L’Institutu Asturianu de Riesgos Llaborales ve recortáu esti añu’l so presupuestu nun 41 por cientu, midida tomada pol Gobiernu autonómicu que foi criticada por Jesús Alonso, secretariu de Salú Llaboral de Comisiones Obreres (CC OO). Alonso tamién llamentó que les cuentes pal 2011 incorporen "remanentes d'años anteriores" del propiu institutu” y que s'aprobaren los presupuestos "ensin pasar l'anteproyectu pela Xunta Rectora”.
 

El Conceyu de Siero y la Fundación HC tán acabantes de firmar un conveniu pa la plantación de 7.000 árboles autóctonos nos tres años próximos. El programa cuenta cola collaboración del Fondu pa la Proteición d’Animales Salvaxes (FAPAS) y incorpora iniciatives d’educación medioambiental.
 

El presidente de Sudán, Omar Hassan al Bashir, decretó oficialmente que "respeta y acata" los resultaos del referéndum sobre la independencia del sur del estáu celebráu’l 9 de xineru que güei dio a conocer la Comisión Eleutoral. Los habitantes de la parte meridional de Sudán apoyaron la so dixebra del norte con un 98,83 por cientu de los votos.
 

Blima, Corquiéu, Verdasca, Fala Non Caduca y Skama la Rede son los grupos qu’aspiren a llevase’l ‘Premiu al Meyor Cantar n’Asturianu’ que va fallase’l 19 de febreru en Mieres nel trescursu d’una gala onde van tocar toles formaciones nominaes. El ganador d’esti galardón va representar a Asturies nel Festival Internacional Liet, certame musical de llingües minoritaries qu’esti añu va celebrase n’Udin/Udine (Friûl).
 

El representante de la izquierda abertzale Rufi Etxeberria anunció que'l partíu nuevu col qu’esta opción política pretende presentase a les elleiciones de mayu va oponese al usu de la violencia y de les amenaces, "incluyendo les d'ETA". La formación nueva, según precisó, "nin xustifica nin ampara l'usu de la violencia, seya'l que seya'l la utilice".