PSOE, IX y PP opónense a la comparecencia d’Areces pa depurar responsabilidaes polítiques

El Bloque por Asturies y Unidá Nacionalista Asturiana (BA-UNA), en boca del so candidatu pa les elleiciones autonómiques de mayu, Rafael Palacios, llamentó la oposición del PSOE, IX y PP na Xunta de Voceros de güei a la comparecencia del presidente, Vicente Álvarez Areces, na Xunta Xeneral pa informar sobre les actuaciones de l’Alministración na trama supuesta de corrupción conocida como ‘Operación Marea’. Pa Palacios esto ye un “exemplu claru de partíucracia”.
 
En declaraciones a Europa Press, Palacios consideró que se trata d'un "exemplu grave" de cómo "los partíos del réxime" torguen a los grupos parlamentarios exercer el control políticu. Coles mesmes, recordó que'l pidimientu del Bloque relativu a la comparecencia pública del xefe del Executivu realizóse con independencia de la vía xudicial, na que, pa la formación, ta actuándose "con valentía". Palacios tamién consideró “estremadamentre grave que se torgue a los grupos exercer el control y preguntar al presidente", y aseguró qu’Asturies necesita un procesu de rexeneración política pa finar colo que denominó “partíucracia”.
 
Amás de la intervención d’Areces, el Bloque tamién solicitó les comparecencies ante les comisiones respeutives d’Ana Rosa Migoya, conseyera d’Alministraciones Públiques, y d’Herminio Sastre, conseyeru d’Educación y Ciencia actual, qu’almitiéronse a trámite. Esti martes va cumplise una selmana dende la entrada en prisión deJosé Luis Iglesias Riopedre, ex conseyeru d’Educación y Ciencia, imputáu na trama xunto con dos empresarios, una funcionaria y la so númberu dos, María Jesús Otero.