El 19 de febreru va dase a conocer Conceyu Abiertu, candidatura d’unidá popular que va contar col sofitu d’Andecha Astur. La formación nacionalista escueye esta opción tres nun llegar a alcuerdos col Bloque por Asturies y UNA.
El PSOE y IX refugaron la comparecencia d’Ana Rosa Migoya na comisión d’Alministraciones pa dar esplicaciones pol casu de corrupción que mantién en prisión a José Luis Iglesias Riopedre. Los partíos nel Gobiernu escúdense nel secretu de sumariu.
El III Certame Lliterariu en Pal.luezu Guzmán Álvarez, entamáu pol Club Xeitu, yá echó a andar. El plazu pa la entrega de trabayos termina’l 15 de mayu y cada persona va poder presentar tres creaciones, de prosa o poesía, como máximo.
Les persones particulares y empreses privaes interesaes n’optar a les ayudes del Gobiernu p’aiciones d’ordenación y desarrollu de viesques en zones rurales yá pueden presenter les sos solicitúes. La convocatoria publicóse güei nel BOPA.
A falta de nueve díes pa la finalización del periodo de votación de los Premios AMAS al traviés d’Internet, la web del Anuariu de la Música Asturiana lleva contabilizaes 40.000 participaciones. La gala de los AMAS va celebrase’l 4 de marzu nel Filarmónica.
La llinia de ferrocarril Asturies-Madrid va contar con un modelu de tren de capacidá menor que l’actual depués del branu. Representantes de Renfe defendieron n’Uviéu esta decisión mui criticada polos usuarios, sindicatos y partíos políticos asturianos.
L’Infiestu va acoyer la VIII Amuesa d’Obres d’Arte pola Oficialidá que reúne creaciones d’artistes donaes pa vindicar los drechos llingüísticos de los asturianos. La esposición va inaugurase’l xueves y va tar abierta’l públicu hasta’l 24 d’esti mes.
La Mesa del Parlamentu catalán almitió a trámite la declaración independentista de Solidaritat Catalana per la Independencia (SI) que va permitir un debate sobre esta proposición de llei na Cámara. Los votos de CiU, claves pa que saliera alantre.
El númberu de pasaxeros del Aeropuertu d’Asturies medró un 14 por cientu en xineru en comparanza coles cifres rexistraes nesi mes l’añu pasáu. 87.700 foi’l númberu de persones qu’utilizaron l’aeródromu de Santiagu’l Monte nesti periodu.
La Casa la Cultura va ser la sede del III Sidra y Blogues, certame onde van premiase los meyores blogues n’asturianu. Delles charres y una espicha van completar el programa d’esta cita entamada pola Xunta de Blogues en Llingua Asturiana.
