La gala del V ‘Premiu al Meyor Cantar n’Asturianu’ va celebrase’l 19 de febreru en Mieres

Blima, Corquiéu, Verdasca, Fala Non Caduca y Skama la Rede son los grupos qu’aspiren a llevase’l ‘Premiu al Meyor Cantar n’Asturianu’ que va fallase’l 19 de febreru en Mieres nel trescursu d’una gala onde van tocar toles formaciones nominaes. El ganador d’esti galardón va representar a Asturies nel Festival Internacional Liet, certame musical de llingües minoritaries qu’esti añu va celebrase n’Udin/Udine (Friûl).
 
A les 19 hores ta previsto l’entamu de la gala onde les tres formaciones de folk y dos de rock-ska van xubise a les tables del Auditoriu de la Casa la Cultura ‘Teodoro Cuesta’ a presentar los sos temes nominaos. Éstos son 'Señaldá', de Blima (lletra y música de Marcos García Alonso), 'Alma balera', de Corquiéu (con lletra de Xandru Martínez y música de Corquiéu); 'Sele sound system', de Fala Non Caduca (con lletra d'Adrián González Pérez y música de Falanoncaduca); 'Condenáu', de Skama la Rede (con lletra de David Artime Coto y música de Skama la Rede); y 'Ente ríos y ente soutos', de Verdasca (con lletra de Miguel Rodríguez Monteavaro y música de Marina Pangua y Andrés R. Monteavaro).
 
La TPA va televisar l’eventu onde tamién va participar Xera. El conxuntu ganador de la edición pasada col cantar ‘Tierra’ y segundu clasificáu nel Festival Internacional Liet de An Oriant/Lorient va actuar nel momentu nel que’l xuráu del premiu, formáu por espertos en música y llingua asturiana, va reunise pa deliberar. La entrada a la gala va ser de baldre hasta completar l’aforu y les puertes del Teodoro Cuesta van pesllase diez minutos enantes del entamu del actu.