Día del Llibru Asturianu

Sócrates dimite como primer ministru de Portugal

|

José Sócrates, primer ministru de Portugal dende 2005, dimitió’l miércoles del so cargu tres el refugu parlamentariu al so plan d’axuste económicu. Esta decisión fai aumentar los rumores sobre un rescate financieru al país lusu.
 
El tamién secretariu xeneral del Partido Socialista presentó la so dimisión al presidente de la República, Anibal Cavaco Silva, y pidió la convocatoria d’eleiciones –que podríen celebrase, de marcase los plazos, la segunda quincena de mayu o la primera de xunu– tres la negativa de la oposición d’aprobar el plan d’austeridá que presentó nel Parlamentu pa ganar la confianza de los mercaos y evitar un rescate financieru. Sócrates lamentó quel “calculismu políticu” de los partíos de la oposición “prevaleciera sobre l’interés nacional”, pa depués señalar que la crisis política “namái va poder resolverse por decisión soberana”. “El país perdió, non ganó. Güei –por ayeri– la irresponsabilidá trunfó sobre’l sentíu de Estáu”, añadió.
 
“La mio única preocupación yera protexer al país de la necesidá de recurrir a l’ayuda esterna”, afirmó Sócrates, qu’aseguró qu’hasta’l “momentu últimu” mantuvo una disposición total pa dialogar colos partíos de la oposición y algamar un consensu. El refugu del plan d’axuste económicu y la dimisión del primer ministru faen aumentar los rumores de rescate a Portugal, que podría costar unos 75.000 millones de euros: 50.000 millones de la Xunión Europea y 25.000 millones del Fondu Monetario Internacional (FMI). D’esta forma, Portugal sería’l tercer país de la Eurozona que solicitaría un rescate tres Grecia y Éire.

Contador Estadistiques