‘L’árbol de la verdá’ va presentase na Llibrería Pallabres de Carambelu

Xurde Fernández y Marián García, autores de ‘L’árbol de la verdá’, van tar esti martes en Candás, na Llibrería Pallabres de Carambelu’, pa presentar esti llibru d’aventures. Los escritores van facer una llectura de la obra a los neños presentes.
 
‘L’árbol de la verdá’, númberu 2 de la coleición pa neños y neñes ‘Camín de Bree’ de Suburbia Ediciones, ye un llibru d’aventures onde’l llector escueye’l camín que va siguir la historia. Asina, según les decisiones que vayan tomándose, la historia de l’aventura trescurre per un lláu o per otru. Una fórmula que presta enforma a los críos y críes, yá que tienen el mandu de los acontecimientos en too momentu. “Ye un llibru qu'estimulará la creatividá y la imaxinación de los nenos”, aseguren dende la editorial.
 
La presentación y llectura de “L’árbol de la verdá’, llibru de 448 páxines con ilustraciones de Gloria Caamaño, va celebrase a les 19.30 hores na Llibrería Pallabres de Carambelu (Valdés Pumarino 12 baxu, Candás).