Jesús Iglesias dixo esti martes que’l Gobiernu d’Álvarez-Cascos ta formáu por “teunócrates”. El voceru d’Izquierda Xunida-Los Verdes d’Asturies (IX-LV) na Xunta Xeneral comparó esti Executivu col de los años últimos del franquismu.
Na madrugada del domingu al llunes, a les 00.30 hores nel marcu de les fiestes de Sama, ta previsto l’entamu del conciertu de presentación del primer discu de Duerna, ‘Manca la Maera’. Más de 100 persones van participar na actuación.
El bancu que conformen, tres la fusión, Caxastur, Caja Cantabria y Caja de Extremadura, yá tien nome. Liberbank va ser la marca comercial d’esta entidá que va utilizase fuera de los territorios orixinales de les trés caxes d’aforros y CCM.
El país subsaḥarianu Guinea-Conakri vivió esti martes un intentu de golpe d’Estáu. Un grupu de militares asaltó la residencia del presidente, Alpha Condé, pero la Guardia Presidencial –que tuvo una baxa– frenó la sulevación.
La Fiscalía Superior del Principáu d’Asturies abrió dilixencies d’investigación sobre’l casu d’una de les muyeres que vieron como se-yos negaba el tratamientu pa ser madre por ser lesbianes. El casu concretu ye’l de Silvia García, vocal de Xega.
L’impactu ambiental altu de l’ampliación de la cantera del Naranco llevó a la Coordinadora Ecoloxista a presentar un recursu de reposición ante Industria. El coleutivu señala qu'Arcelor vien inclumpliendo les llabores de restauración.
El conseyeru de Cultura y Deporte nuevu, Emilio Marcos Vallaure, señaló na toma de posesión del so cargu que’l so oxetivu principal va ser protexer “tol patrimonio cultural” d’Asturies. Dio prioridá al Prerrománicu y a la llingua asturiana.
El primer Conseyu de Gobiernu d’esta llexislatura, celebráu na tarde del vienres, aprobó la creación d’un total de siete viceconseyeríes. Ello supón reducir en trés el númberu de viceconseyeríes del Gobiernu anterior.
El presidente de la Xunta Xeneral, Fernando Goñi, aseguró que la Xunta Xeneral va ser “un organu decisivu” nesta llexislatura. El popular cree que la Cámara va tener protagonismu al nun haber nenguna mayoría nel Parllamentu.
El Reglamentu d’Estudios de Doctoráu va almitir la presentación de tesis n’asturianu. El rector de la Universidá, Vicente Gotor, comprometióse col CUPA a camudar l’artículu del borrador que namái dexaba usar llingües oficiales de la XE.
