Guinea-Conakri vive un golpe d’Estáu fallíu qu’acaba con un muertu

El país subsaḥarianu Guinea-Conakri vivió esti martes un intentu de golpe d’Estáu. Un grupu de militares asaltó la residencia del presidente, Alpha Condé, pero la Guardia Presidencial –que tuvo una baxa– frenó la sulevación.
 
L’intentu tuvo llugar alredor de les tres de la mañana –les cinco n’Asturies– cuando militares “armaos hasta los dientes”, según afirmaron testigos que los vieron circulando peles cais del suburbiu de Conakri onde ta la residencia del presidente, trataron d’asaltar l’edificiu. La rempuesta de la Guardia Presidencial impidió’l golpe d’Estáu y los militares foron deteníos.
 
Dende que llogró la independencia de Francia nel 1958, la historia de la République de Guinée (República de Guinea), nome oficial del país, caracteurizóse polos golpes d'Estáu militares. El primer presidente del país foi'l dictador Ahmed Sekou Touré, que gobernó con mano de fierro hasta abril del 1984, cuando foi derrocáu por otru golpe, nesti casu protagonizáu pol xeneral Lansana Cunté.
 
Cunté consiguió confirmar el so poder nes eleiciones presidenciales del 1993 y gobernó ensin parar hasta la so muerte, n'avientu de 2008. Darréu, Guinea-Conakri sufrió otru golpe d'Estáu que llevó al poder al capitán Moussa Dadis Camara, persona acusada de crímenes contra la Humanidá por una matanza de manifestantes na capital. Ésti sufrió un intentu d’asesinatu nel mes d’avientu del 2009 y perdió’l poder nes presidenciales del 2010, que foi a para a manes d’Alpha Condé, antiguu aliáu y agora enemigu de Camara.