El BOPA del xueves espublizó, en llingua asturiana, la convocatoria de subvenciones pa la normalización del asturianu y del gallego-asturiano. Les perres destinaes son 275.600 euros, más de la metá menos que l’añu anterior.
El presidente d’Asturies, Javier Fernández, confirmó’l miércoles la so intención de construyir la incineradora de Serín. La Coordinadora Ecoloxista critica que’l so partíu apoye n’Asturies la quema de residuos cuando n’Europa opónse a ella.
La fuelga que tuvo llugar esti miércoles y xueves na minería del carbón provocó un paru total nel sector. Los mineros volverán a dexar los sos puestos de trabayu en mou de protesta la selmana próxima, los díes 30 y 31.
El PSOE va gobernar en solitariu n’Asturies tres la decisión de la militancia d’Izquierda Xunida de nun entrar nel Executivu. Los socialistes teníen previsto ceder a la coalición les conseyeríes de Bienestar Social y Vivienda, y Agroganadería.
Los ḷḷenizos Fala Non Caduca van asoleyar nel mes de xunu un EP con seis cantares que lleva’l nome de ‘Al altu la lleva’. La banda ska-rock-folk va presentalu con dos conciertos, el primeru d’ellos el día 14 nel Tierra Astur de Cualloto.
Siete coleutivos reivindiquen nun manifiestu'l 25 de mayu como una fecha clave na historia del pueblu asturianu. Denuncien “la manipulación histórica y l'esborramientu identitariu fechu demientres sieglos pol sucursalismu español”.
Per tercer xueves consecutivu, la comunidá educativa de Cabrales concentróse frente al centru en defensa de la educación pública. Anuncia que va siguir movilizándose en protesta polos recortes que quier imponer el Gobiernu estatal.
Les declaraciones del presidente del país, Javier Fernández, sobre’l ‘casu Marea’ sorpendieron al Bloque por Asturies. La formación nacionalista califica de “pantomima” la creación d’una comisión parllamentaria pa investigar esti asuntu.
El socialista Javier Fernández ye dende esti miércoles presidente d’Asturies. El mierense resultó escoyíu por mayoría absoluta gracies a los votos d’Izquierda Xunida y d'Unión Progreso y Democracia, sumando un total de 23 apoyos.
Un 66 por cientu de los usuarios d’Asturies.com considera preocupante la medra de la estrema derecha y de los partíos xenófobos n’Europa. Grecia y Francia son los exemplos últimos de la consolidación d’estes organizaciones.
