La comunidá educativa de Cabrales concéntrase per tercer xueves en defensa de la escuela pública

Per tercer xueves consecutivu, la comunidá educativa de Cabrales concentróse frente al centru en defensa de la educación pública. Anuncia que va siguir movilizándose en protesta polos recortes que quier imponer el Gobiernu estatal.
 
Según espliquen los trabayadores del centru asitiáu n’Arenas, siéntense “atacaos, despreciaos y fechos de menos col plan d'axuste” del ministru d’Educación, Cultura y Deporte, José Ignacio Wert. Ente les consecuencies direutes que va vivir la escuela de Cabrales por mor de los recortes destaquen la desapaición del segundu ciclu de Secundaria, la ufierta d'una modalidá única de Bachilleratu y la reducción de la mesma nos ciclos formativos van dexar ensin opciones a tol alumnáu de les ales d'Asturies, la supresión del proyeutu billingüe, la xuntura de grupos per ciclos en Primaria y n'Infantil, l’aniquilación de l'atención a la diversidá por falta de recursos humanos, la mengua a la mínima espresión d'actividaes complementaries y estraescolares, la reducción d’ente’l 20 y el 30 por cientu de la plantiya del centru, la imposición a docentes a impartir materies que nun son de la so especialidá y la non sustitución de baxes hasta que nun pasen los primeros 15 díes dende la so comunicación.
 
“Estos recortes suponen un ataque ensin precedentes a la escuela pública, avanzando nel procesu de deterioru y privatización de tolos servicios públicos. Por too esto, vamos siguir movilizándonos y trabayando dende'l nuestru centru col oxetivu claru de nun permitir qu'estes midíes se lleven alantre”, anuncien dende la comunidá educativa del C.P.E.B. d'Arenas.