La carpa instalada nel Parque Ramón de Campoamor pola mor de la Feria del Llibro de Navia va acoyer esti sábadu l’actu d’entrega del XXI Premiu Xeira de Narracióis Curtias. El naviegu Alberto Castro Guión ye’l ganador d’esta edición.
 

Política Llingüística presentó’l Nomenclátor Xeográficu de Toponimia Oficial del Principáu d’Asturies que permite un accesu rápidu a los nomes de llugar oficiales. Ésti yá ta disponible na rede colos datos correspondientes a Xixón.
 

Jesús Gutiérrez, secretariu d’Organización de FSA-PSOE, señaló que la prioridá principal del Gobiernu entrante va ser la ellaboración d’un plan de reequilibriu nuevu. Asturies tien que presentalu al Estáu en 15 díes con un axuste de 616 millones.
 

PSOE y UPyD algamaron un acuerdu que va permitir qu'Asturies cuente con Gobiernu. L'apoyu del diputáu d'UPyD, Ignacio Prendes, resulta imprescindible ante un posible empate na investidura ente los dos alternatives de PSOE-IU y de Foru-PP, dao qu'ambes sumen 22 votos.
 

L'investigador y escritor Bertu Álvarez Peña señala nel so últimu estudiu, 'Mitoloxía sobre los santos n'Asturies. Raigaños paganos del cristianismu', premiu d'ensayu Fierro Botas 2011, que'l cristianismu inventó los Santos cristianos pa da-y acoyida na so relixón a los antiguos dioses de les creencies politeístes paganes europees, anteriores a Cristo.
 

La Xunta pola Defensa de la Llingua (XDLA) refuga al traviés d'un comunicáu la eliminación del toponimu Xixón del logotipu nuevu del Festival Internacional de Cine.
 

El presidente en funciones d'Asturies, Francisco Álvarez-Cascos dixo esti martes qu'Asturies nun sólo ta cumpliendo la normativa de la Llei d'Estabilidá Presupuestaria, sinón qu'amás tien nesti momentu un superávit nes sos cuentes, frutu de los "retayos" que realizó'l so Gobiernu y de la situación de prórroga presupuestaria que nun peermite gastar. Otres comunidaes, dixo, yá anunciaron sicasí que nun piensen cumplilu.

El vicesecretariu d'Organización y Electoral del PP, Carlos Floriano, aseguró esti llunes que'l so partíu apoya que n'Asturies "puea haber un gobiernu de centru derecha" pero alvirtió que l'oxetivu de déficit hai que cumplilu, gobierne'l que gobierne" y "apóyese o nun s'apoye" per parte del PP asturianu al candidatu de Foru, Francisco Álvarez-Cascos.

El ministru de Facienda y Alministraciones Públiques, Cristóbal Montoro, afirmó esti llunes que'l Conseyu de Política Fiscal y Financiera del xueves tien d'aprobar los planes económicu financieros de los gobiernos autonómicos, y que "los plazos son pa toos, y toos tienen que cumplir, y al que nun cumpla va aplicáse-y la Llei d'estabilidá, que para eso ta vixente".

El Tribunal Constitucional almitió los recursos d'amparu presentaos pol Partíu Socialista, l'alcalde de Cuideiru y Izquierda Unida contra'l fallu del Tribunal Superior de Xusticia d'Asturies, que, a instancies de Foru, declaró nulu l'escrutiniu del votu de los residentes ausentes (CERA) na circunscripción occidental y ordenó repitir la votación nun plazu de trés meses. según informaron a Europa Press fontes del TC.