Carbón

9 Setiembre, 2015
Asturies.com

El carbón ye’l mineral que ta más presente na esencia propia d’Asturies. Gracies a él miles de familia pudieron y pueden ganase la vida y les cuenques mineres vivieron momentos de gran prosperidá. Pero tamién tien la so parte negativa, yá que la peligrosidá de la so estraición dexó a munches muyeres viudes y neños y neñes güerfanos.

La so formación diose al descomponese a poco y a poco sustancies orgániques fosilizaes, la mayor parte hai alredor de 300 millones d’años. Trátase d’una roca prieta, mui rica en carbonu, y con cantidaes variables de dellos elementos, principalmente hidróxenu, azufre, oxíxenu y nitróxeno. El carbón foi clave como combustible fósil na Revolución Industrial, sobre manera col inventu de la máquina de vapor, y anguaño entovía xuega un papel importante pese a l’usu d’otru tipu de combustibles, sobre manera’l petroleu.

«Coal bituminous». Publicado bajo la licencia Dominio público vía Wikimedia Commons - https://commons.wikimedia.org/wiki/File:Coal_bituminous.jpg#/media/File:Coal_bituminous.jpg.

Carbón tipu hulla

¿Sabíes qué…? La primer mina de carbón del Estáu foi la d’Arnáu, qu’empezó a funcionar nel 1593, cola peculiaridá de que yera submarina, esto ye, taba baxo’l mar.

El fracasu d’Arnáu llegó pronto, al nun poder competir col carbón inglés. Sicasí, volvería abrir les sos puertes nel 1833 cola creación de la Real Compañía Asturiana de Minas de Carbón, de capital belga. Yeren los años nel que carbón se convirtió na principal fonte d’enerxía. Esta esplotación caltendríase abierta hasta’l 1915.

Nesos mesmos años, col desarrollu de la industria n’Asturies, principió la estraición del mineral n’otros puntos del país, sobre manera nes cuenques mineres. Tanto nel Caudal como nel Nalón abriéronse numberosos pozos, atrayendo inclusive a munchos trabayadores de fuera d’Asturies. Xixón, con mina La Camocha –yá zarrada–, y Cangas del Narcea y Degaña tamién son otres zones prósperes en carbón.

«Ibbenbueren Anthracite» de Educerva - Trabajo propio. Disponible bajo la licencia CC BY-SA 3.0 vía Wikimedia Commons - https://commons.wikimedia.org/wiki/File:Ibbenbueren_Anthracite.JPG#/media/File:Ibbenbueren_Anthracite.JPG

Carbón tipu antracita

¿Sabíes qué…? Nel 1853 inauguróse la vía férrea ente Xixón y Llangréu pa tresportar el carbón de la cuenca a la industria de la zona y da-y salida pel puertu llocal. Ésta foi la tercer llinia peninsular en crease, anque enantes, nel 1837 empezó a furrular una na propia mina d’Arnáu de 600 metros de tracción a sangre.

Cola Revolución Industrial el destín del carbón yera principalmente la producción d’aceru, el ferrocarril y los barcos a vapor, anque cola llegada de la lletricidá nel sieglu XIX empezó a utilizase pa la so xeneración. El desarrollu de los tresportes provocó la sustitución d’esti mineral pol petroleu como principal fonte d’enerxía. Sicasí, el carbón continúa siendo fundamental anguaño.

Esta circunstancia nun impide que’l futuru del carbón asturianu sía bien prieto. La so baxa calidá –produz poco calor poles sos carauterístiques– y el coste altu de la so estraición fai más barato comprar el mineral a otres países como Polonia o Colombia. Ello, xuníu a los zarros de pozos nos años últimos y a los planes de la Xunión Europea pal carbón, llevará al pieslle de toles esplotación pal 2018, un problema pa la prosperidá de les zones mineres asturianes.