Autores: Xurde y David Fernández
Ilustraciones: Francisco Pimiango
Editorial: Pintar-Pintar. Uviéu, 2011
Xurde y David Fernández encaren con esti llibru un testu a cuatro manes que, d'alcuerdo coles sos palabres, permíte-yos, ente otres coses, nun decidir solos hacia ónde va la historia.
"Antón quería ser porteru" ye la historia d'un neñu que, como munchos de los rapacinos d'anguaño, suaña con llegar a ser porteru dalgún día, talo que'l so ídolu en materia futbolística: el porteru del Sporting de Xixón Ablanedo. Sicasí, esti sueñu ye compartíu, y alentáu, pol so pá, que lu acompaña a los entrenamientos enfotándose nes cualidaes del so fíu pal fútbol.
Llibru recomendable pal Segundu Ciclu d'Educación Primaria "Antón quería ser porteru" incorpora a un tema d'interés pa los neños y les neñes como ye'l deporte, otres temes de más fondura como la importancia de l'amistá y la necesidá de da-yos llibertá a los rapacinos pa qu'escueyan los sos intereses y aficiones.
Biblioteca
"Xuan ya Maruxa"
Autor: Roberto González-Quevedo
Ilustrador: Neto
Editorial: Academia de la Llingua Asturiana. Uviéu, 2007 (3ªedición)
L'antropólogu y académicu de la llingua asturiana Roberto González-Quevedo rescata nesti llibru dalgún de los cuentos tradicionales más conocíos de Xuan y Maruxa, el llobu y la raposa colos que la tradición popular representa, de manera fabulada, les rellaciones ente les persones.
Con too, y d'alcuerdu colo que reconoz l'autor nel entamu "estos cuentos pertenecen a la tradición oral, pero nun los pañé d'informantes nin con entrevistas, sinón que son cuentos que guardo na memoria porque los ascuitéi dende siempres en mia casa, especialmente a mia madre, igual que you los contéi a las mias nenas" esto ye, na variantes occidental del nuestru idioma que-y ye propia al autor de Palacios del Sil.
"Les puertes del paraísu"
Autor: Ismael Mª González Arias
Ilustrador: Juan Díaz-Faes Díaz
Editorial: Trabe. Uviéu, 2010
Ganadora del II Premiu MªJosefa Canellada de Lliteratura Xuvenil, "Les puertes del paraísu" presenta, primero de nada, una historia empobinada a los mozos y les moces qu'anden ente les dos agües de la Lliteratura Xuvenil y la Lliteratura p'adultos.
Nesti sen, presenta un documentáu y bien narráu averamientu a la historia del movimientu obreru al traviés de Miguel Cuesta. Esti rapaz, al que la historia asitia na última década del sieglu XIX, ye quien a cuntanos pente medies de la esperiencia, la situación social y económica de los mineros d'Asturies al tiempu que describe'l nacimientu de les primeres organizaciones obreres y sindicales nel Chicago fabril de final de sieglu.
Acompañáu coles xeniales ilustraciones de Juan Díaz-Faes, el llibru de González Arias resulta entós un mui interesante material de llectura pal alumnáu que cursa una Educación Secundaria na qu'andamos tan faltos de lliteratura n'asturianu.
"Deva y yo"
Autor: Vicente García Oliva
Ilustradora: Begmont
Editorial: Pintar-Pintar. Uviéu, 2011
Vicente García Oliva avérase per segunda vez (la primera fuera "Garulla" cola que ganara'l Premiu de la Crítica d'Asturies) al ámbitu del álbum ilustráu pa cuntar una historia entrañable sobre'l procesu d'adaptación a una nueva casa y una nueva familia que tien la protagonista del rellatu: Deva, una perra adoptada.
Trátase d'un álbum qu'afonda nes rellaciones ente animales y persones dende la humanización d'estos últimos, afondando en valores como'l respetu hacia los otros seres vivos que comparten llugar y vida con nosotros.
El testu vien acompañáu polos dibuxos de Begmont, una artista asturiana moza que s'estrena con ésitu nel ámbitu de la ilustración con esti álbum, aportando pincelaes modernes y orixinales al resultáu final del mesmu.
"L'estranxeru"
Autora: Berta Piñán
Ilustraciones: Ana Sáez
Editorial: Ediciones Trabe. Uviéu, 2009
L'estranxeru ye un sitiu un poco raru y por eso una de les más reconocíes escritores n'asturianu, Berta Piñán, fai por esplicanos cómo ye nesti álbum ilustráu acompañáu polos guapos y caldios dibuxos d'Ana Sáez.
Piñán tírase de calón con esti llibru nel tema de les adopciones internacionales al traviés de los güeyos d'una neña a la que la so ma fai por contestái preguntes universales cómo qué ye ser "diferente". Pa ello l'autora usa en tou momentu un llingüaxe cenciellu y tienru y un mensaxe claru tresmitíu pol narrador actor que representa la propia neña.
"Quiero mercar una hermanina"
Autora: MªLuz Pontón
Ilustraciones: Francisco Pimiango
Editorial: Pintar-Pintar. Uviéu, 2010
Como nos confesó la propia autora, MªLuz Pontón, na entrevista que-y ficimos por cuenta de la espublización d'esti llibru, "Quiero mercar una hermanina" ta basada na historia real d'un neñu que quier aforrar pa poder comprar una hermana. Nestu casu Alicia, la protagonista de la historia, piensa no guapo que sería tener una hermana que l'acompañara nes nueches de velea. D'esta miente entama a aforrar y, como nun podía ser d'otru mou acaba plantegándo-yos a los sos pas el so ambiciosu plan. Otra miente la historia tamién fala d'otros temes d'educación en valores como l'adopción o la multiculturalidá.
Llibru especialmente indicáu pa los neños y neñes del Segundu Ciclu de Primaria (ente 8 y 10 años) nel que rescampla'l guapu rexistru d'asturianu que gasta l'autora davezu nes sos obres.
"Malva y el papapallabres"
Autora: Marisa López Diz
Ilustraciones: Elena Fernández
Editorial: Pintar-Pintar. Uviéu, 2010
Marisa López Diz y Elena Fernández vuelven axuntase pa falanos de les aventures de Malva, aquella neña que descubrimos con "Malva y el paragües máxicu", cuentu que viaxara a Chile pa engordar les Biblioteques escolares del país andín.
Nesti casu Malva tien d'encarar el misteriu de la desapaición de toles pallabres de los llibros de la rodiada: el colexu, la so casa... y pa facelo demostrará la mesma intelixencia ya imaxinación que yá nos demostrara nel llibru anterior. Asina Marisa López Diz, autora de Lliteratura Infantil y Xuvenil bien conocida polos neños asturianos afilbana una historia amable, entretenida y de la que rescampla l'usu d'un pallabreru bien guapu. Asina rescatamos palabres y espresiones como "escolingar", "carretar", "afuracar", "recebar el focicu" o "enguedeyu", qu'axuntaes a les munches otres pallabres guapes qu'apaecen nel llibru, aseguren que nenguna Bruxa Xenara nin nengún Papapallabres les faiga desapaecer.
L'álbum, editáu dientro de la colección de Lliteratura Xuvenil de Pintar-Pintar, pue tar indicáu pal Segundu Ciclu d'Educación Primaria.
"El dinosauriu, el príncipe, la nena y la so ma"
Autor: Miguel Rojo
Ilustraciones: Carlos Álvarez Cabrero
Editorial: Pintar-Pintar. Uviéu, 2010
"Cuando espertó, el dinosauriu tovía taba ellí". Cola célebre frase de Monterroso entama esta historia que nos traza, pente medies de la xuntura de situaciones sorrealistes con otres bien reales, una narración fresca, humorística y con dellos trazos de crítica social.
El personaxe del dinosauriu buenu, el príncipe encantáu, la nena imaxinativa y capaz de tomar les sos propies decisiones y la ma que yá nun tien tiempu pa suañar, formen non solo'l títulu d'esti álbum ilustráu, sinón tamién la constelación de personaxes que dan vida a esti cuentu modernu.
Miguel Rojo, un autor imprescindible de la nuestra Lliteratura Infantil y Xuvenil, vuelve a dar nel clavu con un álbum que pue gustar cásique a tolos públicos que quieran y-yos apeteza averase a él.
Autor: Carme Martínez Pérez
Ilustraciones: Carme Martínez Pérez
Editorial: Trabe. Uviéu, 2009
Carme Martínez vuelve a averase nesti llibru a la xuntura ente cuentu tradicional y cuentu xuvenil na que se desenvuelve con tanta traza. Nesti casu ye Macame, una rapacina que ta nesi difícil momentu que va de la neña a la moza, la que fai d'involuntaria protagonista de la historia. Martínez, usando'l guapu recursu del llibru misteriosu que-y da a Macame una vieya nel mercáu, va saltando de les fábules y cuentos tradicionales qu'apaecen nel exemplar, a les histories cotidianes d'una rapacina a la que'l mundu de los adultos sigue paeciéndo-y incompresible.
Como yá pasara coles obres de la autora "Cuentos pa una nueche de lluna" o "Morfema, mormefa, mormera", "Cuentos maraviyosos de mieu y misteriu" resulta un llibru mui recomendable pal públicu xuvenil, rescamplando amás como nestos les ilustraciones de la propia autora.
Autor: Francisco Álvarez Velasco
Ilustraciones: Fernando García-Vela
Editorial: Pintar-Pintar. Uviéu, 2009
El poeta Francisco Álvarez avérase nesti álbum ilustráu a la lliteratura pa los más neños pente medies d'una historia cuntada en versu que parte de la lleenda tradicional china sobre l'orixe de les solombres de la lluna. Rescampla del testu la sensibilidá nel usu de les palabres y la orixinal descripción del suañu de la propia llebre que-y da forma a la lluna. Acompañen los versos unes guapísimes ilustraciones de Fernando García-Vela que faen del guapu resultáu autoría verdaderamente compartida.
