Paquita Suárez Coalla gana'l MªJosefa Canellada de Lliteratura Infantil y Xuvenil

La escritora de Candamu Paquita Suárez Coalla resultó ganadora de la cuarta edición del premiu de Lliteratura Infantil y Xuvenil n'asturianu "MªJosefa Canellada" que concede la Conseyería de Cultura d'Asturies.

El xuráu, qu'aconceyó esti vienres 4 de payares na Casa de Cultura "MªJosefa Canellada" de Santolaya de Cabranes, decidió por unanimidá concedé-y el premiu a la obra de Suárez Coalla titulada "Camín de lletres: d'Asturies a Nueva York" al valorar la so orixinalidá na construcción narrativa y na temática, qu'aborda la realidá de la emigración asturiana d'anguaño. Asina mesmo'l xuráu sorraya la posibilidá de llectura per parte de diferentes edaes y estayes educatives y la naturalidá nel usu del asturianu del testu.
Al tiempu'l xuráu, presidíu pol Director Xeneral de Política Llingüística, Alfredo Álvarez Menéndez y formáu pol l'alcalde de Cabranes, Alejandro Vega Riego, y les escritores y especialistes en LLIX Montserrat Garnacho (ganadora de la edición anterior), Pilar Fernñandez García ya Iris Díaz Trancho; alcordó facer especial mención a les obres presentaes baxo los alcuños de Concha Suárez y Sumiko, pola so calidá narrativa.

Paquita Suárez Coalla (Grullos, Candamu, 1965) vive en Nueva York dende 1994 onde trabaya como profesora de castellán na Universidá de la Ciudá de Nueva York. Ye amás autora de La mio vida ye una novela (Trabe, 2001) una antoloxía de testimonios de muyeres del campu d'Asturies; de la colección de cuentos Pa nun escaeceme (Trabe, 2003), y El día que nos llevaron al cine (Trabe, 2007).