#YoApúntome: comienza’l plazu pa matriculase na materia de Llingua Asturiana y Lliteratura en Primaria

Dende esti xueves y hasta’l día 20 ta abiertu’l plazu de matriculación nel cursu viniente en Primaria, nel que les escolines y escolinos han d’escoyer ente Llingua Asturiana y Lliteratura o Cultura Asturiana, en castellanu. La Conseyería d’Educación y Cultura caltién la campaña de promoción de la materia #YoApúntome, #EuApúntome nel casu del gallego-asturiano.

“Son munches les razones pa deprender la llingua asturiana: aumenta la nuestra competencia comunicativa, ayúdanos nel aprendizaxe d’otres llingües, sensibilízanos con otres realidaes culturales y llingüístiques y arriquez el nuestru conocimientu y percepción del mundu”, destácase dende’l Gobiernu, mensaxe que se difunde de manera más amplia al traviés de cartelos, ‘flyers’ y tarxetones (dixitales) que se pueden ver nos centros escolares del país dende hai selmanes. L’oxetivu ye esplicar a les families y a los alumnos los beneficios que conlleva la materia d’asturianu y gallego-asturiano, qu’en Primaria ye voluntaria  –cola altenativa de Cultura Asturiana, en castellanu– y en Secundaria y Bachilleratu optativa en competencia con otres materies y llingües estranxeres.

Pa los más mayores, la campaña de matriculación comienza’l 1 de xunetu y va allargase hasta’l día 15 d’esi mesmu mes. La campaña #YoApúntome –#EuApúntome pa la zona falante de gallego-asturiano– estrenóse con ésitu hai dos años y nesta ocasión suma, pa les redes sociales, un videu fechu por escolinos del xixonés Colexu Públicu Cabueñes basándose nel popular cantar ‘They don't care about us’, de Michael Jackson, que versioneen pa la defensa de l’asignatura como ‘Nun tien por qué desapaecer’.