La campaña de matriculación n'asturianu y gallego-asturiano #Apúntate va llegar a la radio y la televisión

La Conseyería d'Educación y la de Cultura, Política Llingüística y Turismu entamen una campaña p'animar a la matriculación nes materies de Llingua Asturiana y Gallego-asturiano más ambiciosa qu'otros años. Nesta ocasión va saltar de les escueles y les redes a la radio y a la televisión.

Si’l cursu pasáu tenía’l nome de #YoApúntome, #EuApúntome nel casu de la llingua del occidente del país, nesta ocasión cambia a #Apúntate. Con ella les conseyeríes pretenden, amás de promover la matriculación na materia, facer “llegar a la sociedá, y n'especial a les persones implicaes na enseñanza, el compromisu del Gobiernu asturianu pa cola llingua asturiana y pa col gallego-asturiano”.

Asina, amás de la tradicional cartelería impresa y la destinada pa les redes sociales, va contar con cuñes radiofóniques, que se van emitir na RPA, y un anunciu de televisión que se va espublizar na TPA, dando’l saltu asina de les escueles y les redes sociales a tola ciudadanía al traviés de los medios de comunicación. La promoción faise tanto n'asturianu como en gallego-asturiano.

Ábrese’l 23 de xunetu

La campaña de matriculación en toles etapes educatives va abrise’l 23 de xunetu, con fecha final el 31 del mesmu mes en Primaria. N’ESO y Bachilleratu allárgase hasta'l 7 de setiembre.