'Versonaxes', poesía ilustrada pa grandes y pequeños

La editorial Pintar-Pintar espubliza ‘Versonaxes’, un llibru de poemes escritos por Aurelio González Ovies acompañaos por ilustraciones d'Ester Sánchez.

Los 23 poemes describen, al traviés del versu, la palabra y l'imaxe, a 23 personaxes reales y fantásticos, cercanos y cotidianos. Les pequeñes y apuntiaes pincelaes d'Ester Sánchez xúnense de forma máxica colos testos, completándose mutuamente nun álbum que pueden esfrutar tanto grandes como pequeños.

'Versonaxes' xúnese a otros álbumes de poemes ilustraos d'Aurelio González, editaos por Pintar-Pintar, tantu n'asturianu como en castellanu, dende 'El poema que cayó a la mar' (2007), hasta' Loles' (2011), incluyendo títulos como 'Cascoxu' (2008), 'Chispina' (2008), 'Too ama' (2009) y 'Mio madre' (2010).

Amás del llibru, la editorial espublizará una aplicación pa iPad disponible por 1.79 euros na que pueden atopase los poemes d'Aurelio González Ovies correspondientes a la edición impresa, acompañaos poles ilustraciones interautives d'Ester Sánchez, semeyes, enllaces y un xuegu que consiste n'entamar tou un revoltixu de versos sueltos.