Siguen los talleres infantiles 'Les tradiciones suenen y presten'

Talleres ‘Les tradiciones suenen y presten’ Avilés

Entámalos la Estaya de la Llingua d'Avilés en delles biblioteques del conceyu. Son de baldre y tán destinaos a neñes y neños, pero ye necesario acutar plaza en cada centru municipal al ser éstes llendaes.

"Coles manes, metíes nel barru y, usando materiales reciclaos, vamos conocer la nuestra tradición teyera y tocaremos los nuestros sones", espliquen los responsables de 'Les tradiciones suenen y presten'. En total son dos talleres que va poner Aladanza Educación y Tradición: 'Sones y percusiones' y 'Enteteyando'.

El que ta agora en marcha ye'l primeru, destináu a neñes y neños d'ente 7 y 10 años que van deprender a facer un panderu tradicional a partir de dalgo tan fácil como una caxa pizza. Estrenóse'l vienres pasáu na Biblioteca de La Xungarosa y sigue esta tarde na de La Carriona, cola sesión última prevista, na de Los Canapés, nel próximu.

La otra propuesta, pa conocer  xugando les construcciones populares d'Asturies y la so rellación colos oficios d'enantes, va tener como primer sede La Carriona'l 14 de mayu, pa siguir en La Xungarosa'l 28 y el 4 de xunu en Los Canapés. Tolos talleres son de baldre, con places llendaes, y van tener un llargor 90 minutos, de 18.30 a 20 hores.