La Reciella de la Factoría torna con trés propuestes en llinia

‘Les madreñes vacíes’, de Carlos Alba, abre'l vienres la edición serondiega de La Reciella de la Factoría. Por mor de la situación pola pandemia de COVID-19 les trés propuestes d’esta iniciativa de la Estaya de la Llingua d’Avilés van poder siguise en llinia namái.

Esta decisión vien pol fechu de que les normes de seguranza y proteición sanitaria escontra la COVID-19 amenorguen l’aforu del Espaciu Escénicu de la Factoría hasta dexalu sólo en 20 persones. Poro, decidióse grabar nesi mesmu escenariu les actuaciones y emitiles na rede, pudiendo asina llegar tamién a neñes y neños de tol planeta.

L’encargáu d’abrir esta temporada de La Reciella de la Factoría va ser Alba esta tarde a les 19 hores con ‘Les madreñes vacíes’, representación programada pa marzu que tuvo qu’aplazase pola pandemia. Nella’l monologuista va guiar con marionetes y teatru a los espectadores per un viaxe llargu pel Oriente.

El premiáu ‘El viaxe de Covaletti’, tamién

La siguiente sesión va tener llugar el 20 de payares, a la mesma hora, con ‘Cachivaches’, d’Ana Morán. Mentes, el 11 d’avientu va ser el turnu de ‘El viaxe de Covalleti’, d’Higiénico Papel, obra ganadora del IV Premiu y Festival Nel Amaro de Teatru Profesional en Llingua Asturiana o Gallego-asturiano.

Les representaciones van poder siguise pela web de la Estaya de la Llingua d’Avilés y la del Conceyu, asina como nes redes sociales municipales y na plataforma Playpresta.