Higiénico Papel algama’l so segundu Nel Amaro con ‘El viaxe de Covaletti’

Depués de ganar nel 2018 con ‘Hansel y Gretel’, Higiénico Papel Teatro convirtióse na primer compañía en llevar en dos ocasiones el Premiu y Festival Nel Amaro de Teatru Profesional en Llingua Asturiana o Gallego-asturiano. ‘El viaxe de Covaletti’ foi la escoyida pol xuráu como merecedora del gallardón nesta cuarta edición.

L’acta destaca de la obra “la capacidá actoral qu'amuesa pa crear mundos ficcionales a los que tresporta al espectador, con una caracterización mínima”. Tamién que pon en valor “la humanización de la llectura lliteraria entendida como'l soporte que asiste a les persones en tiempos de soledá, lo mesmo qu'asocede nestos tiempos de pandemia”.

‘El viaxe de Covaletti’ ye una historia qu’anima a les rapacines y rapacionos a la llectura. Ésta trata d’un emplegáu d'una gasolinera en metá de nenguna parte, que nunca viaxó, nin conoció más llugares qu'ési, qu’atopa nos llibros entretenimientu y fuximientu.

Ensin movese de la so siella, viaxa colos personaxes a mundos desconocidos y exóticos, nesti casu a una islla perdida del mar Mediterraneu, onde vive Pippo Covaletti, el mozu protagonista d'una ruta per tierra, mar y aire llarada d'aventures y descubrimientos. Carlos Dávila pon n’escena esta obra, que llevó al asturianu Xuan Costales y na que Laura Iglesias s'encarga de la direición y la dramaturxa.

Siempre finalista

Ésta ye la segunda vegada qu’esta compañía, finalista nes cuatro ediciones del premiu, lleva’l Nel Amaro, que tien una recompensa de 6.000 euros. Nel 2018 foi cola visión personal del cuentu clásicu de los hermanos Grimm ‘Hansel y Gretel, mentes que los ganadores nos otros años foron ‘Llázaro de Tormes’ (2017), de Carlos Alba 'Cellero', y ‘Les rellaciones peligroses’ (2019), de Factoría Norte.

Nesta edición del premiu convocáu pola Conseyería de Cultura, Política Llingüística y Turismu “cola mira de consolidar, arriquecer y prestixar la llingua asturiana y el gallego-asturianu nel ámbitu del arte dramáticu” el xuráu tuvo conformáu pola actriz y filóloga María Cotiello; la escritora y filóloga, Pilar Fernández: la filóloga y profesora, Mar Friera; l’escritor y profesor Chechu García; y l’actriz y crítica teatral, Eva Vallines, con Irene Arce, xefa de serviciu de la Direición Xeneral de Política Llingüística, como presidenta, y con Juncal García Velasco, tamién xefa de serviciu de la Direición Xeneral de Política Llingüística, como secretaria. El restu d’obres finalistes, que se representaron esti mes nel uvieín Teatru Filarmónica, na cuarta edición del Nel Amaro foron ‘El pelegrín valiente’, de Nun Tris; ‘La neña de les trences al revés’, d’El Callejón del Gato; y ‘El viaxe de Dorothy’, de Fantastique Company.